6 желтоқсан, сенбіге қараған түні Шымкент пен Тараз қалаларының тұрғындары жер сілкінісін сезді. Жер сілкінісінің ошағы Алматыдан оңтүстік-батысқа қарай 565 км жерде болды, деп хабарлайды Қазақстан Төтенше жағдайлар министрлігіне сілтеме жасаған KAZ.NUR.KZ.

ТЖМ мәліметінше, "Сейсмологиялык зерттеу институты" сейсмикалық станциялар желісі 2025 жылғы 6 желтоқсанда Астана уақыты бойынша 2 сағат 4 минутта жер сілкінісін тіркеді.

Жер сілкінісінің ошағы Өзбекстан аумағында Алматы қаласынан оңтүстік-батысқа қарай 565 километр жерде орналасқан.

Сезілу күші:

Тараз бен Шымкент қалаларында – 2 балл

"Зардап шеккендер мен ғимараттардың қирауы туралы мәлімет түскен жоқ", — делінген ТЖМ хабарламасында.

Осы орайда ТЖМ жер сілкінісі кезіндегі он қарапайым қадамды назарға ұсынды:

1. Жер дүмпуі кезінде үрейленбеңіз;
2. Жер сілкінгенде лифті, баспалдақты қолданбаңыз;
3. Жиhазға, терезеге жақын тұрмаңыз;
4. Жасырынатын жерді табыңыз — жоғарғы қабаттарда негізгі іргелі қабырғалардың бұрышында жасырыныңыз;
5. Ғимараттан шығыңыз (төменгі қабаттарда); көп қабатты үйлерде жер сілкінісі аяқталған соң ғимараттан шығыңыз;
6. Кетер алдында суды, газды, электр қуатын мүмкіндік болса, өшіріңіз;
7. Дабыл жол сандығын алыңыз (алдын ала дайындау қажет);
8. Электр желілерден, ғимараттан, ағаштардан аулақ болыңыз;
9. Жер сілкінуіне дайын болыңыз;
10. Қарт адамдарға, балаларға, мүгедектігі бар адамдарға көмек көрсетіңіз.

Мәтіннен қате тапсаңыз, бізге жазыңыз