ОКҚ алаңында өткен баспасөз мәслихатында қаржы вице-министрі Ержан Біржанов елімізде жалпы сомасы 188 млрд қарызы бар 50 мыңнан астам азамат банкрот деп танылғанын айтты, деп хабарлайды KAZ.NUR.KZ.

Қаржы вице-министрі Ержан Біржановтың айтуынша, жеке тұлғалардың банкроттығы туралы заңнаманы жетілдіру жалғасады.

"2025 жылғы 1 қаңтарға дейін жасалған қарыз шарттарына борышты реттеуді жүргізу туралы талапты алып тастау; борышкердің себептерін көрсетпей соттан тыс банкроттық рәсімін тоқтату құқығы; банкроттың қаржы ұйымдары алдындағы, оның ішінде кредиттік бюролар базасында көрсетілмеген барлық міндеттемесін тоқтату қарастырылған бірқатар түзетулер қабылданды", — деді спикер.

Сонымен қатар парламентте ломбардтарды соттан тыс банкроттық рәсіміндегі кредиторлардан шығару, сондай-ақ борыштары 1600 АЕК-ке дейінгі борышкер азаматтар үшін банкроттық рәсімін өткізу мерзімдерін қысқарту бойынша түзетулер қаралып жатыр.

Еске салайық, 2023 жылдың 3 наурызында Қазақстанда қарызы бар азаматтарға өзін банкрот деп жариялауға мүмкіндік беретін заң күшіне енді. 2024 жылы банкроттық рәсімі бойынша бірқатар талаптарды алып тастау арқылы айтарлықтай жеңілдетілді.

Айта кетейік, бұған дейін үкімет отырысында Қаржы нарығын реттеу және дамыту агенттігінің төрағасы Мәдина Әбілқасымова банкроттық рәсім жеңілдетілетінін мәлімдеген. Оның айтуынша, алдағы уақытта банктер тиісті кандидаттарды өздері анықтай бастайды және оларға SMS арқылы қарыздарды есептен шығару мүмкіндігі туралы хабарлайды.

Мәтіннен қате тапсаңыз, бізге жазыңыз