Дүниежүзілік денсаулық сақтау ұйымы мен ҚР Денсаулық сақтау министрлігінің деректеріне сүйенсек, қан айналым жүйесінің аурулары еліміздегі өлім-жітім себептерінің арасында бірінші орында тұр. Жыл сайын мыңдаған отандасымыз алдын алуға болатын инфаркт пен инсульттен көз жұмады. Соңғы жылдардағы ең қорқынышты үрдіс – жүрек ауруларының тым "жасарып" бара жатқаны. Толығырақ NUR.KZ материалында.

Біздің жүрегіміз неге мезгілінен бұрын сыр беріп, жап-жас әрі белсенді адамдарды кардиологиялық науқастарға айналдырып жатыр? Ағзаның қандай жасырын белгілері мен дабылдарына немқұрайлы қарауға мүлдем болмайды және ең басты сұрақ: сапалы ем алу үшін міндетті түрде шетел асу керек пе, әлде Қазақстанның оңтүстігінде де әлемдік жетекші клиникалардың стандартына сай жоғары технологиялық көмек қолжетімді ме? Осы сауалдарға жауап алу үшін NUR.KZ тілшілері "Шымкент жүрек орталығы" КЕАҚ-ның үздік сарапшыларымен және тәжірибелі дәрігерлерімен егжей-тегжейлі сөйлесті.

Бұрын күрделі оталар үшін оңтүстік тұрғындарына Астанаға немесе шетелге баруға тура келсе, қазір халықаралық деңгейдегі кардиологиялық көмек Шымкентте қолжетімді. "Шымкент жүрек орталығы" – оңтүстік өңір медицинасының кардиохирургия бойынша көшбасшысы. Міне, нақты көрсеткіштер: 110 мыңнан астам науқас емделді, 7 мыңнан астам ашық жүрекке ота жасалды, 3 500 аортокоронарлық шунттау орындалды, 2 жүрек трансплантациясы жүзеге асқан.

Орталық ең ауыр жағдайдағы науқастарды да қабылдайды, соның ішінде LVAD (сол жақ қарыншаны механикалық қолдау) қондырғысын орнату сияқты күрделі процедуралар да жасалады. Қазір осындай 21 құрылғы сәтті орнатылған.

Жүрек орталығының қабырғасында Оңтүстік Қазақстанда алғаш рет жүрек трансплантациясы өтті. Бұл – UMC және дәрігер Юрий Пямен тығыз әріптестікте жұмыс істейтін жергілікті команданың жоғары біліктілігін дәлелдейтін кардиохирургияның шыңы.

"Біздің басты мақсатымыз – науқасты ота үстеліне дейін жеткізбеу", — дейді жүрек орталығының дәрігерлері.

Дәрігерлер әсіресе оңтүстік тұрғындарына тән негізгі қауіп факторларын атады, оның ішінде майлы тамақты, тұз бен қантты шамадан тыс көп жеу, аз қимылдау, стресс және зиянды әдеттер. Салдарынан қан тамырлары холестеринге толып, икемділігін жоғалтады, қан қысымы көтеріледі. Осылайша жүректің ишемиялық ауруы (ИБС) мен артериялық гипертензия дамиды.

"Көптеген науқас кеудесі ауырса да, оны остеохондрозға немесе шаршағандыққа балап, шыдап жүре береді. Олар жай ғана ауырсынуды басатын дәрі ішіп, баға жетпес уақытын жоғалтады. Өкінішке қарай, кейде аурудың бірінші және соңғы белгісі – жүректің кенеттен тоқтауы болып жатады", — дейді орталық дәрігерлері.

Мамандар жағдайдың ушыққанын күтпеңіз деп ескертеді. Олар қабылдауға жазылуды қажет ететін белгілерді атап өтті: кеуденің ауыруы немесе қысуы, ентігу, жүрек ырғағының бұзылуы, аяқтың ісуі және қан қысымының жоғарлауы.

Ақ халаттылардың сөзінше, ауруды емдегеннен гөрі, оның алдын алу әлдеқайда оңай әрі арзан. Сол себепті орталық кешенді тексеру (Check-up) бағдарламаларын іске қосуда.

Медициналық мекемедегі чек-ап толық диагностикадан тез, кезексіз және жайлы жағдайда өтуге мүмкіндік береді. Бүгін тексеру бағдарламаларына зертханалық анализдер, ЭКГ және жүрек УДЗ-cы (эхокардиография) және тәжірибелі кардиологтың кеңесі кіреді.

Мәтіннен қате тапсаңыз, бізге жазыңыз