Қаладағы су шаруашылығы кешенінің жабдықтары 90 пайызға тозған.

Үкімет резервінен Ұлытау облысының сумен жабдықтау инфрақұрылымын жаңғыртуға 1,8 млрд теңге бөлу туралы қаулыға премьер-министр Олжас Бектенов қол қойды, деп хабарлады Үкіметтің баспасөз қызметі. Кешен 1966 жылы пайдалануға берілсе, жабдықтары бүгінде 90%-ға тозған.

Қазіргі уақытта нысанда ұзындығы 4 шақырым инженерлік желілер (кәріз, жылумен жабдықтау, жарықтандыру) тартылып, трансформаторлық қосалқы стансалар мен тарату құрылғылары салынды. Сүзілген және ауыз суға арналған 4 резервуар қайта құрылды және пайдалануға берілді, сорғы жабдығы жаңартылды.

Үкімет резервінен бөлінген қаражат нысанның құрылыс-монтаж жұмыстарын аяқтап, 2026 жылы жоспарлы пайдалануға мүмкіндік береді.

Жезқазғанның инфрақұрылымын жаңғырту жөніндегі жұмыс – халықтың сумен жабдықтау қызметтеріне қолжетімділігін қамтамасыз ету жөніндегі жүйелі жұмыстың бір бөлігі. 2024 жылдың қорытындысы бойынша сапалы ауыз суға қолжетімділік қалаларда – 99,4%, ауылдық елді мекендерде – 98%-ды құрайды.

100% көрсеткішке қол жеткізу үшін 2025 жылы Үкімет республикалық бюджетте 257 жобаны жүзеге асыруға 105,7 млрд теңге қарастырған. Бұдан бөлек, Арнаулы мемлекеттік қордың қаражаты есебінен 229 жобаны жүзеге асыруға қосымша 135,8 млрд теңге бөлінді.

Оқи отырыңыз:

• Тоқаев Үкіметке әуе хабтарын дамыту мәселелерін шұғыл шешуді тапсырды
• Алатау қаласын дамыту мәселесі Үкімет деңгейінде қаралды