Синоптиктер желтоқсанда Қазақстанда күн райы қандай болатынын болжады, деп хабарлайды "Қазгидромет" РМК-ға сілтеме жасаған KAZ.NUR.KZ.

Метеорологтардың мәліметінше, желтоқсан ел аумағында күн райы құбылмалы болады: жауын-шашын (негізінен қар) түсіп, ашық, аязды күндермен ауысып отырады.

Кей жерлерде екпінді жел, бұрқасын, тұман және көктайғақ күтіледі, бұл желтоқсан үшін қалыпты болып саналады.

Республиканың басым бөлігінде айлық орташа ауа температурасы норма шамасында болады, батыс аумақтарында – нормадан 1-2°С жоғары, ал елдің солтүстік-шығыс және шығысында – нормадан 1°С төмен болмақ.

Желтоқсанның бірінші онкүндігінде атмосфералық фронттардың әсерінен тұрақсыз ауа райы сақталады: батыста, солтүстікте, шығыста және орталықта жауын-шашын күтіледі – негізінен қар жаууы ықтимал, сондай-ақ елдің оңтүстік-батысында және оңтүстік жартысында да жаңбыр, қар күтіледі.

Ал Қазақстанның шығыс, оңтүстік-шығысындағы таулы және тау бөктеріндегі аудандарда қатты қар жаууы ықтимал.

Желтоқсанның басында күндізгі ауа температурасының фоны келесідей:

• батыс және Ұлытау облысында 0...+8°С;
• солтүстік және орталық өңірлерде -3...+2°С;
• шығыста 0...-8°С;
• елдің оңтүстік жартысында +5...+13°С.

Онкүндіктің соңына қарай солтүстік-батыс антициклоны Арктикадан келетін суық ауа массаларының әсерінен күшейіп, ел аумағының басым бөлігінде ауа температурасының төмендеуіне әсер етеді:

• елдің батысында түнде -5...-10°С, күндіз -3...-8°С шамасында;
• солтүстік, шығыс және орталық аумақтарда түнде -10..-18°С шамасында, шығыстың кей аудандарында түнде -23°С-қа дейін, күндіз -5...-13°С-қа дейін төмендейді;
• елдің оңтүстігінде және оңтүстік-шығысында түнде -5...+2°С, күндіз +3..+10°С шамасында болады.

Екінші және үшінші онкүндіктерде түнгі температуралық фон -15...-20°С-тан -5...-10°С-қа дейін ауытқиды, күндіз -3...+2°С-тан -5...-10°С-қа дейін өзгереді, ал шығыста жекелеген күндері түнде ауа температурасы -25...-35°С-қа дейін, күндіз -15...-20°С-қа дейін төмендеуі мүмкін.

Батыста және елдің оңтүстік бөлігінде түнде ауа температурасы 0...-5°С-тан -7...-12°С-қа дейін ауытқиды, ал күндіз негізінен 0...+8°С шамасында болады.

Мәтіннен қате тапсаңыз, бізге жазыңыз