Алматыда Желтоқсан көшесінде BRT (Bus Rapid Transit) желісі іске қосылады, — деп хабарлайды Massaget.kz тілшісі.

Сондықтан қозғалысты ұйымдастырудың жаңа сызбасы енгізіледі. Ұзындығы 4,6 шақырым болатын жаңа желі Тимирязев көшесіндегі қолданыстағы BRT учаскесі мен Райымбек батыр даңғылы бойында салынып жатқан аумақты жалғап, оңтүстіктен солтүстікке қарай үздіксіз автобус қатынасын қамтамасыз етеді.

"Жүргізушілерге жол ережелерін қатаң сақтап, жолдағы таңбалар мен белгілерге мұқият назар аудару қажет. Бұл аумақта құқықбұзушылықты бақылауға алатын сурет және бейнетіркеу жүйелері де жұмыс істейді", — деп жазылған хабарламада.

Жоба аясында арнайы жолақтар жол бойының шетінде орналастырылған.

"Солтүстік бағытқа қозғалғанда бөлінген жолақ көшенің оң жағында, ал кері бағытта сол жағында сызылған. Жеке көліктер үшін Абай даңғылынан солтүстікке қарай бұрынғыдай біржақты қозғалыс тәртібі және жолақ саны сақталады", — деп жазылған хабарламада.

Жаңа бағыттар бойынша автобустар 14 желтоқсаннан бастап екі бағытта да қатынай бастайды. Алғашқы кезеңде №92 және №59 маршруттарын іске қосу жоспарланып отыр.

Қызықты жаңалықтар мен видеоларды көру үшін TikTok арнамызға жазылыңыз!