Қарағандыда мейрамхана иесі тұрғындардан той өткізу үшін ақша алғанымен, ешбір той өтпей қалған. Енді наразы тұрғындар қаражатын қайтара алмай жүр, деп хабарлайды "КТК" арнасы.

Жиналғандар мейрамхананың жарнамасы мен ұсынған жеңілдіктеріне сеніп қалдық дейді. Онда фотозонаны және адам санының белгілі бір мөлшеріне кейбір столды тегін жасап береміз делінген. Мұны естігендер төлемді алдын ала жасап қойған. Бірақ уақыт жақындаған кезде тойдың болмайтынын түсінген. Оны мейрамхана иесінің өзі ашық айтқан.

Елден жинағаны 30 миллион теңгеге жуық. Ол ақша есеп-қисаптың дұрыс жүргізілмегендігінен, басқа шараларға жұмсалып кетті деп отыр. Полиция алаяқтық бабымен іс қозғады. Дегенмен мейрамхана иесі ісімді дөңгелетіп, қарыздан құтыламын деп отыр.

"Өкінішке қарай, сол кіріс болмай, қаншама еңбек істесек те, қанша той жасасақ та, ештеңе сатып алып үлгермеппіз. Жай ғана ақша жоқ. Ештеңе етпейді, бәрі реттеледі. Ең бастысы, халыққа ақшаны қайтарып, ренжітпеймін. Сәл уақыт шыдау керек", — дейді мейрамхана иесі Айгүл.

Дереккөз: "КТК" арнасы

Мәтіннен қате тапсаңыз, бізге жазыңыз