Салаға мамандарды елімізде 24 ЖОО дайындайды.

Қазақстанда ауыл шаруашылығы саласында маман тапшылығы жоғары. Салада қызмет ететін мамандардың 28 пайызында ғана профильді жоғары білім бар. Бұл мәселені көтерген сенат депутаттарына жауап берген үкімет басшысы Олжас Бектенов оны шешу үшін бірнеше бағыттағы жұмыстар қолға алынғанын атап өтті.

Премьер-министрдің сөзінше, қазіргі таңда сала мамандарын 24 жоғары оқу орны дайындайды. Оқу пәндерінің 30 пайыздан астамын өткізуге өндірістегі сала мамандары қатысады. Оған қоса, 900-ден астам профильді кәсіпорында өндірістік тәжірибе ұйымдастырылған.

"Жыл сайын салалық мемлекеттік және жергілікті атқарушы органдардың, ғылыми ұйымдардың және бизнес қауымдастықтық қатысуымен мамандарға деген сұраныс зерттеледі. Соның нәтижесінде жыл сайын шамамен 3,5 мың грант бөлініп отыр", – делінген премьер-министрдің жауабында.

Олжас Бектенов, сондай-ақ, жастардың аграрлық мамандықтарды таңдауына басымдық беру үшін білім беру квотасы 30-дан 35 пайызға дейін артқанын да еске салды. Оған қоса, ауыл шаруашылығы мамандықтарына түсу үшін жинау қажет балдың төменгі шегі 60-тан 50-ге дейін төмендетілген.

"Ауыл шаруашылығы министрлігі аграрлық білім беруді жаңғырту және жоғары білікті мамандарды даярлау үшін 2025-2030 жылдарға арналған жол картасын әзірледі. Онда білім беру бағдарламаларын жаңарту, аграрлық ЖОО мен колледждер жанынан құзыреттер орталықтарын құру, жас мамандарға арналған әлеуметтік пакетті дамыту және кадрлық қажеттіліктерге цифрлық мониторинг жүргізу шаралары қамтылған", – деді Олжас Бектенов.

Оқи отырыңыз:

• "Бірі ауылда жұмыс жоқ десе, бірі жұмысшы жетіспейді дейді". Президент маман тапшылығы туралы
• Ауыл шаруашылығына шетел инвесторларын тарту жұмысын тездету қажет – Тоқаев