Қазақстан мен Өзбекстан үш жаңа әуе бағытын ашты.

Қазақстан мен Өзбекстан жаңа әуе бағыттарын ашып, Жібек жолы бойынша ортақ турларды іске қосады. Бұл туралы Үкіметтің баспасөз қызметі хабарлады.

Премьер-министр Олжас Бектеновтің тапсырмасына сәйкес, екі ел арасындағы туризм мен көлік байланысын күшейту жұмыстары қарқын алды.

Көлік министрлігінің мәліметінше, 1 желтоқсаннан бастап SCAT әуекомпаниясы үш жаңа халықаралық бағыт бойынша тұрақты рейстерді іске қосады:

• Түркістан – Бұхара,
• Түркістан – Үргеніш (Хиуа),
• Түркістан – Самарқанд.

Әр бағытта аптасына үш рет ұшулар жоспарланған. Билет құны – 40 мың теңге, ал бастапқы кезеңде жолаушылар ағынын қалыптастыру үшін рейстер субсидияланады. Жаңа маршруттар Ұлы Жібек жолы бойындағы тарихи қалаларды ілгерілетіп, өңірлердің көлік қатынасын арттыруға және шетелдік туристерді тартуға бағытталған.

Оқи отырыңыз: Аптасына 2 рет: Астанадан Бішкек пен Самарқанға тікелей рейстер ашылады

Туризм және спорт министрлігі Жібек жолы бойынша Орталық Азияның ортақ маршрутының жаңа тұжырымдамасын әзірледі. Бағытқа Алматы, Шымкент, Түркістан, Ташкент, Самарқанд, Бұхара және Хиуа қалалары енгізілген. Сондай-ақ ортақ тарихи мұра мен табиғи нысандар да маршрут құрамында.

Самарқандқа алғашқы тур kompastour компаниясымен бірлесіп іске қосылды. Қазір басқа туроператорлармен жаңа бағыттар бойынша келіссөздер жүріп жатыр. 2026 жылы Қазақстан мен Өзбекстан туристік әлеуетін бірлесіп халықаралық деңгейде ілгерілету жоспарланып отыр.