Бұл туралы Caravan.kz медиа порталы хабарлайды.

Спорт комментаторы Исатай Мади “Бірінші бол” YouTube арнасына берген сұхбатында Шавкаттың мансабында титулдық жекпе-жектің ауылы алыстап кеткенін айтты.

“Бақ шаба ма, бап шаба ма дегендей Шавкаттың бағы жанса да бабы шаппай қалғанын көріп отырмыз. Бір жыл бұрын дивизиондағы жағдай құлдырау болып көрінді. Белал Мұхамед керемет чемпион болып көрінген жоқ. Ол уақытта Шавкат үздік үштікте болды. Соны пайдаланып, титулды алуға болатын еді. Бәріміз күтіп отырдық. Титулдық жекпе-жектің уақыты желтоқсанға белгіленді. Бірақ Белал жарақат алып қалғаннан кейін мамырға өзгертті. Ол уақытта Шавкат жарақат алды. Белал 14 ай төбелеспеген Маддаленадан ұтылып қалады деп ойлаған жоқ. Сол уақыт аралығында жап-жас, Шавкаттан еш кем емес Шон Брэди, Моралес көтеріліп кетті. Қазір титулды жекпе-жек тек контекстте Шавкаттың есімі аталмайды. Бір жағынан оның да кінәсі емес, факт ретінде тіркейік. Белгілі бір факторлардың кесірінен Шавкат бұрынғыдай титулға жақын тұрған жоқ. Қазір кем дегенде бір рет төбелесіп, оны ұту керек. Дивизионда не болып жатыр, соны қару керек. Өйткені, бұл — нақты кестемен жүретін футбол емес. Қазір Исламмен Маддаленаның нәтижесін күту керек. Ислам алдын ала, қазірдің өзінде Усманмен шығамын деп айтып жатыр. Ол чемион болса, Усманмен келесі жылы жазда немесе күзде төбелеседі. Одан кейінгі жекпе-жегі 2027 дейін кетеді. Оған дейін Шавкат тағы бір рет төбелесу керек. Дивизион құжынап жатқан жап-жас қасқырлар. Сондықтан титулды жекпе-жектің ауылы алыстап бара жатыр. Бұл — факт”, — дейді ол.

Сондай-ақ, ол файтердің жақсы сөйлей алуы да маңызды екенін айтты.

”Осы уақытқа дейін Шавкат ағылшынша бірде-бір сөз айтқан емес. Асу да сол. Ал Бекзат сол мәселені шеше бастады. Азат тіпті ағылшыншаны қойып, қазақша сұхбат бергісі келмейді. Өте тұйық жігіт. Ол жерде эмоция беру керек. Қалған аналитиканы салқынқанды отырып айтып бересің”, — дейді ол.

Еске сала кетейік, Шавкат Рахмонов UFC рейтингінде жартылай орта салмақ дәрежесінде 4-ші орында тұр.

Қазақстандық спортшы жарақатына байланысты 2024 жылдың желтоқсанынан бері октагонға шыққан жоқ.