Сот қаулысымен кәсіпкер кінәлі деп танылып, оған 550 мың теңге көлемінде айыппұл салынды .

Тараз қаласының әкімшілік құқық бұзушылықтар жөніндегі мамандандырылған сотында ӘҚБтК-нің 182-бабының 1-бөлігі бойынша (Әдейі банкроттық) П.-ға қатысты іс қаралды.

Жеке кәсіпкердің несиелік берешегі 14 млн теңгеден асқанда қулыққа көшкен, деп жазады inbusiness.kz сайты Тараз қаласының ӘҚБжМС баспасөз қызметіне сілтеме жасап.

Жеке кәсіпкер П., ақша қаражатын жасыру арқылы кредиторлар алдындағы міндеттемелерді орындаудан жалтару мақсатында 2021 жылдың 1 қаңтарынан 30 сәуіріне дейін есеп айырысу шотынан 46,4 млн теңге қолма-қол ақшаны шешкен. Бұдан бөлек өз атына рәсімделген көлігін де есептен шығарған.

"Мемлекеттік кірістер департаменті жеке кәсіпкердің соңғы 3 жылдағы қаржы-шаруашылық қызметіне талдау жүргізді. Талдау нәтижелері бойынша әдейі банкроттық белгілерінің болуы туралы қорытынды жасалды", — делінген сот хабарламасында.

Сот отырысында кәсіпкер П. өзінің кінәсін мойындап, барлық табыс жеке тасымалдаушылармен есеп айырысуға бағытталғанын түсіндірді.

Салық органының өкілі соттан П.-ны жауапқа тартуды сұрады. Құқық бұзушының кінәсі МАЭС шешімімен, экономикалық тергеу департаментінің хатымен, әдейі банкроттық белгілерінің болуы туралы қорытындымен және істің басқа да материалдарымен дәлелденді

ӘҚБтК 182-бабы 1-бөлігінің санкциясымен жеке тұлғалар үшін 200 АЕК, заңды тұлғалар үшін 400 АЕК мөлшерінде айыппұл қарастырылған.

Сот оның бірінші рет құқық бұзушылық жасауын, кінәні мойындауын, жас балаларының болуын және П.-ның өз отбасының жалғыз асыраушысы екенін жеңілдететін мән-жайлар ретінде таныды.

Қаулы заңды күшіне енді.