3,8 млн USDT бұғатталды .

Қаржы мониторингі агенттігінің (ҚМА) Алматы қаласы бойынша департаменті Warner Bros атауын пайдаланып құрылған қаржы пирамидасына қатысты тергеуді аяқтады.

Тергеу материалдарына сүйенсек, ұйымдастырушылар азаматтарға жоғары табыс уәде етіп, инвестиция салуға үгіттеген. Жобаға заңды сипат беру үшін оның атауында танымал голливудтық компанияның бренді пайдаланылған. Қатысушыларға фильм трейлерлерін көру және жаңа салымшыларды тарту арқылы табыс табу ұсынылған.

"Пирамида 9 деңгейден тұрған. Орташа салым — 225 мың теңге. Барлық төлемдер тек USDT криптовалютасы арқылы қабылданған. Сызбаны кеңейту үшін әлеуметтік желілер мен мессенджерлер белсенді қолданылған: администраторлар арнайы чаттар құрып, оқыту өткізіп, нұсқаулықтар мен бейнероликтер таратқан, жедел табыс пен криптовалюта түріндегі бонус уәде еткен. Тергеу барысында салымшылар қаражатын сақтау және аудару үшін пайдаланылған криптоәмияндар анықталды. Сот санкциясымен жалпы сомасы 3,8 млн USDT көлеміндегі криптоактивтерге тыйым салынды", – делінген хабарламада.

Оқи отырыңыз: "Сотқа жеткізбей-ақ шешуге болар еді". ҚМА Жанәбіловтер ісі бойынша тергеудің жайын түсіндірді

Сот үкімімен қаржы пирамидасын ұйымдастырушы 5 жылға бас бостандығынан айырылды. Сонымен қатар 40 жәбірленушінің азаматтық талаптары қанағаттандырылып, олардың залалы бұғатталған криптоактивтер есебінен өтелетін болды.

Үкім әзірге заңды күшіне енген жоқ.