Батуми мұнай терминалы арқылы жүктерді ауыстырып тиеудің жалпы көлемі алты миллион тоннадан асты. Бұл жаңа операциялық меже Мемлекет басшысы Қасым-Жомарт Тоқаевтың Транскаспий халықаралық көлік маршрутын дамыту және Қазақстанның Қара теңіздегі логистикалық әлеуетін нығайтуға қатысты берген стратегиялық тапсырмаларын орындау барысында жүзеге асты. «ҚазТрансОйл» компаниясы — Батуми мұнай терминалы және теңіз портының 100%-тік үлесін басқарудың эксклюзивті құқығына ие екенін айта кеткен жөн.

Батуми мұнай терминалы мен Батуми теңіз порты заманауи, көпфункционалды логистикалық орталық. Ол контейнерлік тасымалдаулармен бірге мұнай өнімдерінен бастап минералдық тыңайтқыштарға дейінгі жүктің түр-түрін қабылдап, қайта өңдеу қабілетіне ие. Ал оңтайлы географиялық жағдайы маңызды халықаралық көлік дәліздерін қамтамасыз етіп, Қазақстанның ғаламдық сауда серіктесі ретіндегі рөлін бекіте түседі.

Фархат Тәшібаев, «Батуми Мұнай Терминалы» ЖШҚ бас директоры:

- 2025 жылдың қараша айының басында «Батуми теңіз порты» айлақтары арқылы ауыстырып тиеудің жиынтық көлемі 6 млн тоннадан асты. Көрсеткіштің артуы негізінен өткен жылдың сәйкес кезеңімен салыстырғанда құрғақ жүктердің контейнерлік, паромдық және жекелеген номенклатураларын ауыстырып тиеумен, сондай-ақ қазақстандық өндірушілердің мұнай құю жүктерін тұрақты жеткізуімен және ауыстырылып тиелетін мұнай өнімдері көлемінің артуымен байланысты.

Транскаспий халықаралық көлік маршрутының негізгі бөлігі саналатын Батуми порты тұрақты жеткізілімдерді, Қазақстан, Грузия және Қара теңіз аймағындағы елдердің экономикалық байланысын қолдауды қамтамасыз етіп, әлеуетін арттыра бермек.

Мамука Мурджикнели, Wondernet Express Investment Group бас директоры:

- Бүгінгі күні кәсіби команда басқаратын Батуми портымен ынтымақтастық орнатқанымызға қуаныштымыз. Тыңайтқыштарды тасымалдау мен Орталық дәлізді дамытуда Батуми портының орны айрықша. Себебі порт арқылы Орталық Азияда өндірілген өнімдер әлемнің түкпір-түкпіріне тасымалданады.

«Батуми мұнай терминалы» компаниялар тобы «ҚазТрансОйлдың» транзиттік бағыттарының тиімділігін арттыру стратегиясын алдағы күндері де жүзеге асырады. Сол секілді Батуми портының өңірдің энергетикалық және логистикалық инфрақұрылымының стратегиялық орталығы ретіндегі мәртебесін нығайтады.

Авторлары: Фариза Жанғанаева, Юлия Тужилкина, Шалва Сурамелашвили