Қазір полиция қылмыстық іс қозғалып, тергеуді бастаған.

Атырау облысы Индербор кентінде жетінші сыныптың оқушысы әлімжеттіктің құрбаны болды, деп хабарлады 31 арнаның Информбюро ақпараттық бағдарламасы.

Жеткіншекке қатарластары жабылып, тепкінің астына алды дейді анасы. Оңбай таяқ жеген жәбірленушінің миы шайқалып, денесі көк алай қойдай көгерген. Қазір жасөспірім ауруханада ем қабылдап жатыр. Ұлының жағдайын ойлап, алаңдаған ата-анасы сотқар балалардың заң аясында жазаланғанын қалайды. Нұртөре Жаңабайдың жағдайы қазір дәрігерлердің бақылауында.

Анасының айтуынша, жеткіншекке сыныптастары үзіліс кезінде күш көрсеткен. Кабинеттің есігін жауып алып, ұлыма білгендерін істеді дейді Әйгерім Сұлтанова. Көп соққы алып, есеңгіреген оқушы үйіне әрең жеткен көрінеді. Ал мұғалімдердің оқиға туралы тіс жармай, жасырмақ болғаны ата-ананың ашуына тиген. Білім басқармасының өкілдері буллинге жол берген педагогтар жазаланғанын жеткізді.

"Бұл жағдай бойынша қадағалауға алмаған сынып жетекшісіне, кезекшілік атқарған мұғалімге, тәрбие ісі жөніндегі орынбасары, мектеп директорына қатысты шара қолданылды.Сөгіс берілді. Сынып жетекшісі жұмыстан босатылды. Біз олар бойынша барлығына ден қойып, профилактикалық шаралар жүргізіп тұрамыз", – деді Атырау облыстық білім беру басқармасының бас маманы Дулат Хамзин.

Қазір полиция қылмыстық іс қозғалып, тергеуді бастаған.

"Жасөспірімдердің кәмелеттік жасқа толмауына байланысты олардың заңды өкілдерінің қатысуымен жауаптар алынуда. Сот-медициналық сараптамасы да тағайындалды. Қатарласын соққы жыққан балалар арнайы есепке алыныпты. Бірақ бұл жазаға жәбірленуші тараптың көңілі толмайды. Олар жаңа оқу жылында баламыз тағы да әлімжеттіктің құрбаны бола ма деп қорқады", – деді Атырау облысы полиция департаментінің баспасөз хатшысы Мейірім Ердәулет.