Қазақстан мен Қытай арасындағы ғылыми, мәдени-гуманитарлық байланыстарды дамытуда Орталықты қосар үлесі тиімді болмақ.

Қытайдың Сиань қаласында орналасқан Цзяотун университетінде "Шәкәрім атындағы Қазақстан-Қытай мәдени зерттеу орталығының" ашылу салтанаты өтті, деп хабарлайды inbusiness.kz сайты.

Бұл ұлы қазақ даласынан шыққан ойшыл, тәлімгер ойшылдың шығармашылығы мен философиясын шетелдік аудиторияға таныстыруға бағытталған тұңғыш институционалды орталық.

Орталықтың ашылуында сөйлеген сөзінде Қазақстан Республикасының Сиань қаласындағы Бас консулы Жошыхан Қыраубаев "Шәкәрім атындағы Қазақстан-Қытай мәдени зерттеу орталығы" қоғамдық дипломатия саласында тиімді алаңға айналып, Қазақстанның тарихы мен мәдениетін, тілі мен құндылықтарын, сондай-ақ Қазақстан Республикасы Президенті Қ.К.Тоқаевтың халықаралық саяси бастамаларын кеңінен насихаттайтынын атап өтті.

Іс-шараға ҚР Ғылым және жоғары білім вице-министрі Гүлзат Көбенова, Шәкәрім университетінің ректоры Думан Орынбеков, Цзяотун университетінің ректоры Чжан Лицюн, Шэньси өңірінің білім беру, мәдениет және туризм, Сыртқы істер басқармаларының басшылары, Халықаралық ұйымдардың, дипломатиялық корпустың, іскерлік және мәдени топтардың, сондай-ақ студенттер мен БАҚ өкілдері қатысты.

Жиынға қатысушылар Қазақстан мен Қытай арасындағы қазіргі заманғы ғылыми және білім беру серіктестігі екі мемлекет басшыларының үйлесімді стратегиялық бағытына – Қазақстан Республикасының Президенті Қасым-Жомарт Тоқаевтың интеллектуалды ұлт қалыптастыру және академиялық көшбасшылықтың жаңа орталықтарын дамыту жөніндегі стратегиялық курсы мен Қытай Халық Республикасының Төрағасы Си Цзиньпин ұсынған "Бір белдеу – бір жол" бастамасына негізделгенін атап өтті.

Шәкәрім орталығының ашылуы – Президент Қасым-Жомарт Тоқаевтың интеллектуалды экономика мен мәдени дипломатияны дамыту стратегиясымен үндес. Мәдениет пен білім – адам капиталының өзегі және дамудың қозғаушы күші. Шәкәрім орталығы – сенімнің, серіктестіктің және танымға ұмтылыстың символы екені аталып өтті.

Бұл ұстанымдар Қазақстан мен Қытайдың бірлескен академиялық бастамаларының өзегіне айналып, бүгінде олар нақты нәтижеге бағытталған жобалар — ғылыми зертханалар, мәдени орталықтар және зерттеу альянстары түрінде жүзеге асырылуда.

Шара соңында Сиань Цзяотун университеті (ҚХР) тарапынан Шәкәрім университетіне (Қазақстан Республикасы) "Электрлік автоматтандыру жөніндегі Қазақстан-Қытай бірлескен зертханасына" арналған жабдықтардың алғашқы партиясын беру туралы естелік сертификат салтанатты түрде табыс етілді.

Іс-шараға қатысқан қазақстандық және қытайлық оқушылар тобы орталықтан Шәкәрім Құдайбердіұлының өмірі мен мол мұрасы туралы қазақ және қытай тілдерінде толық ақпарат ала отырып, Орталықта қазақ халқының ежелгі дәуірден бүгінге дейінгі мәдени даму кезеңдері туралы мәлімет алу мүмкіндігіне ие болды.

Ұйымдастырушылар мен қонақтар мұндай бастамалардың бұқаралық дипломатияның, өркениетаралық диалогтың және өзара тиімді ынтымақтастықтың дамуына елеулі үлес қосып, шетелдегі қазақтар қауымдастығын біріктіруге, халықтар достығын нығайтуға және Қазақстанның мәдени мұрасын халықаралық деңгейде насихаттаудағы маңыздылығын атап өтті.

Сиань Цзяотун университеті — Қытай Халық Республикасындағы ең көне және беделді мемлекеттік жоғары оқу орындарының бірі, 1896 жылы негізі қаланған. Университет Қытайдың ең үздік тоғыз жоғары оқу орнын біріктіретін C9 лигасына мүше, бұл лига АҚШ-тағы "Ivy League" университеттеріне ұқсас және ең жоғары академиялық әрі ғылыми көрсеткіштерге ие ұлттық университеттер одағы болып табылады.

Бүгінде Сиань Цзяотун университеті Қытайдың жетекші зерттеу университеттерінің бірі саналады. Ол инженерия, медицина, жаратылыстану ғылымдары, менеджмент және заманауи технологиялар салаларындағы жетістіктерімен танымал.

Университет QS және THE халықаралық рейтингтерінде жоғары орындарға ие, "Бір белдеу — бір жол" бастамасы аясында халықаралық серіктестіктерді белсенді түрде дамытып келеді, сондай-ақ Азия, Еуропа және Орталық Азия елдерінде ғылыми-инновациялық парктер мен технологияларды трансферлеу орталықтарын құруға қатысады.