Кездесу нәтижесінде туризм саласындағы ынтымақтастық туралы меморандумға қол қойылды.

Алматы әкімі Дархан Сатыбалдының Бейжің қаласына жасаған жұмыс сапары барысында China Professionals-Workers International Travel Service Head Office (CPITS) компаниясының өкілдерімен кездесу өтті, деп хабарлайды inbusiness.kz сайты.

Құжат Қытай Халық Республикасынан Алматыға жыл сайын 50 мыңға дейін туристер ағынын ұйымдастыруды және үйлестіруді көздейді. Келісім екі жақты туризмді дамытуға, мәдени байланыстарды нығайтуға және Алматыны Орталық Азиядағы жетекші туристік бағыттардың бірі ретінде ілгерлетуге бағытталған.

Алдын ала есеп бойынша, бір қытайлық туристің қонақүйге орналасу, тамақтану, экскурсиялар және сатып алуларға жұмсайтын шығыны орта есеппен 1 500 АҚШ долларына барады. Осылайша, 50 мың турист қабылдаудан күтілетін экономикалық әсер жылына шамамен 75 млн АҚШ доллары болмақ. Бұл қаланың экономикасы, қызмет көрсету саласы және шағын бизнес үшін айтарлықтай серпін береді.

Алматы әкімі Дархан Сатыбалды меморандумның маңыздылығын атап өтті:

"Алматы өңірдегі туристік картада әрдайым жетекші орынға ие. Қытайдан келетін қонақтарды тартуда үлкен әлеует бар екенін көріп отырмыз. Бұл келісім ұзақ мерзімді серіктестікке және өзара тиімді ынтымақтастыққа негіз болады деп сенеміз", – деді ол.

CPITS – Қытайдағы ең ірі туроператорлардың бірі. Компания Алматыға ұйымдастырылған туристік топтарды қалыптастыру және туристік бағдарламаларды ілгерлету жұмыстарын жүзеге асырады. Келісімді іске асыру алдағы туристік маусымда басталады.