Бұған АҚШ Қаржы министрлігінің мәлімдемесі себеп болған.
Gunvor халықаралық мұнай трейдингтік компаниясы Ресейдің ең ірі жеке мұнай-газ компаниясы "Лукойлдың" шетелдік активтерін сатып алу туралы ұсынысын кері қайтарды. Компания бұл туралы 6 қараша күні X әлеуметтік желісіндегі парақшасында жазды, деп хабарлайды inbusiness.kz сайты DW агенттігіне сілтеме жасап.
Gunvor-дың тиісті шешімі АҚШ Қаржы министрлігінің мәлімдемесінен кейін бір сағат ішінде жарияланды. Вашингтон аталған компанияның Мәскеумен байланысы бар екенін айтып, Украинадағы соғыс бітпейінше оған бизнес жүргізуге рұқсат беруден бас тартқанын мәлімдеді.
"Президент Трамп соғыстың дереу аяқталуы тиіс екенін нақты жеткізді. Путин қантөгісті жалғастырып жатқан кезде Gunvor Кремльдің қуыршағы ретінде ешқашан лицензия ала алмайды, табыстан да құр алақан қалады", – делінген АҚШ Қаржы министрлігінің мәлімдемесінде.
Өз кезегінде Gunvor компаниясы бұл айыптауды негізсіз деп атады. Олар компанияның Ресеймен байланысын тоқтатқанына он жылдан асқанын, санкцияларға байланысты сауда жасаудан бас тартқанын, ресейлік активтерін сатқанын және Украинадағы соғысты ашық айыптайтынын мәлімдеген.
"Біз бұл түсінбестікті түзете алатынымызға қуаныштымыз. Gunvor "Лукойлдың" шетелдік активтерін сатып алу туралы ұсынысын кері қайтарады", – деп хабарлады компания.
2000 жылы Gunvor компаниясын ресейлік кәсіпкер Геннадий Тимченко мен швед бизнесмені Торбьёрн Тёрнквист құрған. Компания Кипрде тіркелген. 2014 жылы халықаралық санкциялар күшіне енбей тұрып, Тимченко өз үлесін серіктесіне сатып жіберген. Кейін Gunvor Ресейдегі активтерін біртіндеп сата бастады.
Айта кету керек, бұған дейін "Лукойлдың" шетелдік еншілес компаниясын кімнің сатып алатыны белгілі болғанын жазғанбыз.
