Енді Астанада жол қозғалысы әуеден дронмен бақыланады, — деп хабарлайды Massaget.kz тілшісі.

Полицияның мәліметіне сүйенсек, қала өміріне толық бақылау орнатылған. Ол үшін түрлі заманауи құралдар, соның ішінде бейнекамералар, смарт-жетондар, автопатрульдерге орнатылған бейнеқұрылғылар және ұшқышсыз ұшу аппараттары пайдаланылады.

"Қазір алты заманауи дрон күн сайын қала көшелерін шолып, көлік ағынын бақылайды. Жол қозғалысы ережелері бұзылып жатса, оны да тіркейді, көлік нөмірлерін анықтап, оларды іздеу базаларымен салыстырады", — деді ІІМ өкілі.

Мәселен дронның көмегімен теміржол өткелінде шлагбаум жабылар сәтте жолды кесіп өткен Kia көлігінің жүргізушісі анықталған. Осылайша жүргізуші әкімшілік жауапкершілікке тартылған.

Дрондар көлік жүргізу кезінде телефон пайдалану және көлік жүргізу ережелерін бұзу сияқты өзге де заңбұзушылықтарды анықтайды.

"Мәдени және спорттық іс-шаралар кезінде де дрондар арқылы онлайн трансляциялар ұйымдастырылып, бейнежазбалар полицияның жедел басқару орталығына тікелей беріледі", — деді полиция.

Өзекті жаңалықтарды өз уақытында оқу үшін Facebook парақшамызға жазылыңыз!