Алматының «Қайрат» клубының U-19 командасы УЕФА жасөспірімдер лигасының жалпы кезеңіндегі төртінші тур ойынында миландық «Интерден» ойсырай жеңілді, деп хабарлайды Skifnews.kz ақпарат порталы.

Милан қаласында (Италия) өткен кездесуде алаң иелері 3:0 есебімен жеңіске жетті. Голдардың авторлары: 21-минутта пенальтиден Матиас Москони, 37-минутта Дилан Сарате және 54-минутта Джамал Иддриссу.

Аталған ойында қазақстандық команданың қақпасын Чемпиондар лигасының негізгі кезеңінде екі матч өткізген 18 жастағы Шерхан Қалмырза қорғады. Сонымен қатар «Қайрат» U-19 сапында бастапқы құраммен алаңға Данияр Ташпулатов, Әмірбек Базарбаев, Мұстафа Шен, Адлан Нұрғалиев, Мұхамедәлі Әбіш, Шыңғыс Дүйсенбек (капитан), Әкетжан Қалиқұлов, Исмаил Бекболат, Мансұр Бірқұрманов және Азамат Тұяқбаев шықты.

Бұл жеңіліс алматылықтар үшін турнирдің жалпы кезеңіндегі төртінші рет қатарынан болған сәтсіздік. Бұған дейін олар кипрлік «Пафосқа» (1:3), испаниялық «Реалға» (1:4) және португалиялық «Спортингке» (2:3) жол берген еді.

Келесі турларда «Қайрат» жастар командасы 26 қарашада Данияның «Копенгаген» клубымен, ал 9 желтоқсанда гректің «Олимпиакосымен» кездеседі.