Мұны алматылық ұжымның бас бапкері матч алдындағы баспасөз мәслихатында айтқан.

Бүгін қазақстандық "Қайрат" футбол клубы Чемпиондар лигасының 4-турында италиялық "Интерге" қарсы кездесу өткізеді, деп хабарлайды inbusiness.kz сайты.

Бас бапкер Рафаэль Уразбахтин БАҚ өкілдерінің сұрағына жауап беріп өтті. Оның сөзінше, "Қайраттың" капитаны әрі негізгі ойыншысы Александр Мартынович "Астанаға" қарсы матчта жарақат алып қалған.

– Бізде Қазақстан чемпионат аяқталды. Команда өзінің үздік екенін тағы да дәлелдеді.

Александр Мартыновичке келсек, ол "Астанаға" қарсы кездесуде жарақат алды. Оның орнына Александр Широбоков шығады. Мен оған мүмкіндік беремін. Қалғанын тағы көре жатармыз. Жалпы алғанда, барлық ойыншының дайындығы жақсы. Бұндай кездесулерде әркім өзін көрсеткісі келеді, – деді Уразбахтин.

Қос команда арасындағы матч бүгін, яғни 5-нен 6 қарашаға қараған түні сағат 01:00-де Миландағы Джузеппе Меацца стадионында өтпек. Әзірге "Қайраттың" қоржынында бір ғана ұпай бар. Алматылық ұжым азулы "Спортингтен" 1:4 және "Реалдан" 0:5 есебімен ойсырай ұтылса да, "Пафоспен" (0:0) тең ойнап, 1 ұпайға қол жеткізді.