Үкімет басшысы Олжас Бектенов Беларусь премьер-министрі Александр Турчинмен келіссөз жүргізді. Тараптар екіжақты тауар айналымын ұлғайтуды пысықтап, инвестиция, өнеркәсіп, ауыл шаруашылығы, цифрлық индустрия сынды салалардағы серіктестікті қарастырды.

Көлік және логистика, денсаулық сақтау, туризм бағыттарына да назар аударылды. Олжас Бектенов ел Үкіметінің қарым-қатынасты дамытуға дайын екенін жеткізді. Өз кезегінде Беларусь премьер-министрі де байланысты бекітуге бейіл екенін растады. Келіссөз соңында бірқатар құжатқа қол қойылды. Оның ішінде өнеркәсіптік кооперация саласындағы ынтымақтастықты дамытудың, сондай-ақ Астана мен Минск арасындағы сауда-экономикалық, ғылыми-техникалық және мәдени ынтымақтастық туралы жол картасы бар. Одан бөлек Алматы облысы мен Витебск облысының арасындағы ынтымақтастық туралы меморандум да қарастырылған.