Батыс Қазақстан облысы бойынша Қаржылық мониторинг агенттігінің департаменті (ҚМА) банктік шотты заңсыз иеленіп, рұқсатсыз төлемдер мен ақша аударымдарын жүзеге асыру дерегі бойынша тергеу жүргізіп жатыр, деп хабарлайды Egemen.kz.

ҚМА баспасөз қызметі мәлім еткендей, алаяқтық істі ұйымдастырушылар уақытша жұмыс ұсынған түр танытып, жастарға екінші деңгейлі банктерде өз атына шот ашуды ұсынған.

«Интернет-банкинг мобильді қосымшаларын алаяқтардың құрылғыларына орнатқаннан кейін, шоттарға қол жеткізу толықтай олардың бақылауына өткен. Осындай әрекеттерге қатысқан тұлғалар, яғни «дропперлер», 200-ден 350 АҚШ долларына дейін сыйақы алған. Бұл шоттар арқылы интернет-алаяқтық құрбандарынан түскен қаражат аударылып отырған», делінген хабарламада.

Агенттік дерегінше, заңсыз операциялардың жалпы көлемі 17 миллион теңгеден асқан.

«Оқиғалардың бірінде банктік карта бұғатталғаннан кейін, бір дроппер заңсыз әрекеттерге әрі қарай қатысудан бас тартқан. Қылмыстық топ мүшелері оған күш қолданып, қорқытып, шотқа қайта қолжетімділікті қалпына келтіруді талап еткен», деп мәлім қылды ҚМА баспасөз қызметі.

Бүгінде аталған қылмыстық істің ұйымдастырушысы күдікті ретінде ұсталып, қамауға алынған.

«Тергеу жалғасып жатыр. Өзге ақпарат Қылмыстық-процестік кодексінің 201-бабына сәйкес жария етілмейді», делінген ресми хабарламада.

Айта кетелік, биыл 16 қыркүйектен бастап Қылмыстық кодекске енгізілген жаңа 232-1-бап дропперлікке – банктік шотқа, төлем құралына немесе жеке сәйкестендіру тәсіліне заңсыз қол жеткізуді беру, сату не сатып алуға – қылмыстық жауапкершілік белгілейді.

Аталған бап – жаза ретінде мүлкін тәркілей отырып, 7 жылға дейін бас бостандығынан айыруды қарастырады.