Кішкентай баласының болуына байланысты жазаны орындау кейінге қалдырылды.

Қарағандыдағы Қазыбек би атындағы аудандық сот Алика Мұхамадиеваға қатысты айыптау үкімін шығарды, деп хабарлайды inbusiness.kz сайты.

Облыстық прокуратураның мәліметінше, сот Қылмыстық кодекстің 174-бабының 1-бөлігі бойынша бас бостандығынан айыру жазасын тағайындаған айыптау үкімін шығарды. Қала тұрғыны 3 жыл 6 айға бас бостандығынан айырылды. Осы үкіммен Алика Мұхамадиеваға Қылмыстық кодекстің 74-бабының тәртібінде жазаны орындауды кейінге қалдыру шарасы тағайындалды. Яғни, жазаны өтеу екі жыл мерзімге кейінге қалдырылды.

"Кейінге қалдыруды қолдануға оның 2 жасар баласының болуы негіз болды. 2025 жылғы 16 қыркүйектен бастап Қылмыстық заңға 5 жылдан астам бас бостандығынан айыру жазасы тағайындалатын жекелеген қылмыстарды қоспағанда, жас балалары бар әйелдер үшін жазаны өтеуді кейінге қалдыруды міндетті түрде қолдануды көздейтін өзгерістер енгізілгендіктен, бүгінгі күні жазаны кейінге қалдыру міндетті норма екеніне назарларыңызды аударамыз", – делінген хабарламада.

Айта кету керек, бұған дейін желіде қазақтарды қорлаған қарағандылық әйел қамауға алынғанын жазғанбыз.