Оқу-ағарту министрінің тапсырмасымен күні кеше Алматы қаласына Балалардың құқықтарын қорғау комитетінің төрағасы шұғыл түрде іссапармен барды.

Ол "НЗМ" ДББҰ Басқарма төрағасымен, ҚР Оқу-ағарту министрлігінің аумақтық департаментінің өкілдерімен, өңірлік Бала құқықтары жөніндегі уәкілмен және қоғамдық кеңес мүшелерімен бірлесе отырып, мектеп ұжымымен, оқушының ата-анасымен және өзімен кездесті, деп жазады inbusiness.kz сайты.

Ашық әрі сындарлы диалог барысында орын алған жағдай жан-жақты зерделеніп, баланың әрі қарай білім алу жолдары қарастырылды. Бұл ретте шешім заңнама талаптарына сай, баланың құқықтары мен мүдделерін, оның ішінде толыққанды білім алу құқығын ескере отырып қабылданды.

ҚР Оқу-ағарту министрлігі педагогқа құрмет көрсету мен оның кәсіби пікірімен санасуды білім беру ортасының негізін құрайтын маңызды қағидаттар ретінде атап өтеді. Тағы да бір мәрте ескертеміз: Қазақстан Республикасының "Педагог мәртебесі туралы" заңының нормаларын қатаң сақтау қажет. Мұғалімге құрмет көрсету мен қауіпсіз білім беру ортасын қамтамасыз ету - білім беру саласындағы мемлекеттік саясаттың басым бағыттарының бірі болып қала береді.