Мәжіліс сенаттың "Жасанды интеллект туралы" заң мен оған ілеспе түзетулерге енгізген түзетулерімен келісті, деп хабарлайды KAZ.NUR.KZ мәжілістің баспасөз қызметіне сілтеме жасап.

Сенат жасанды интеллект туралы түзетулерге редакциялық сипаттағы өзгерістер енгізді.

Жұмыс тобының жетекшісі Екатерина Смышляеваның айтуынша, сенат барлығы 16 түзету енгізген. Олар мәжіліс қабылдаған заңдардың мазмұнын өзгертпейді.

"Оның барлығы редакциялық және нақтылау сипатында. Бұл түзетулер құқық қолдану жүйесіне ешқандай әсер етпейтіндіктен, біз парламент сенаты енгізген өзгерістер мен толықтыруларға келісуге болады деп санаймыз", — деді мәжіліс депутаты.

Еске сала кетейік, биыл 23 қыркүйекте мәжілістің жалпы отырысында мәжіліс депутаттары жасанды интеллект туралы заңды қабылдады. Мәжіліс төрағасы Ерлан Қошанов ұлттық жасанды интеллект платформасы құрылатынын мәлімдеді. Ерлан Қошанов жасанды интеллект туралы заң президенттің жаппай цифрландыру және жасанды интеллектіні кеңінен қолдану туралы бастамасын іске асыру жолындағы іргелі қадам екенін атап өткен еді. Палата спикері Қазақстан әлемде мұндай заң қабылдаған алғашқы елдердің қатарында екеніне назар аударды.

Ал бір апта бұрын сенаторлар "Жасанды интеллект туралы" заңға түзетулер енгізіп, оны мәжіліске қайтарған. Нақты айтқанда, 18 жасқа толмаған адамдарға темекі өнімдерін сатқаны үшін коммерциялық емес ұйымдардың әкімшілік жауаптылығын енгізу ұсынылды. Сондай-ақ жасанды интеллект жүйелерін пайдалана отырып жасалған туындылар адамның оларды жасауға шығармашылық үлесі болған жағдайда ғана авторлық құқықпен қорғалады деген түзету енгізу мәселесі сөз болды. Сенат депутаттары жасанды интеллект жүйелерін пайдалану кезіндегі тәуекелдерге қатысты өзгерістер бойынша да ұсыныстар берді.

Мәтіннен қате тапсаңыз, бізге жазыңыз