Былтырғымен салыстырғанда елде электр қуатын тұтыну көлемі артқан .

Қазақстан өзін энергиямен толықтай қамтамасыз етіп отыр. Шекті жүктеме кезінде ғана тапшылық пайда болады. Бұл туралы Энергетика вице-министрі Санжар Жаркешов айтты, деп хабарлайды inbusiness.kz сайты.

Энергетика вице-министрі Санжар Жаркешовтің сөзінше, Қазақстан энергиямен өзін толықтай қамтамасыз етіп отыр. Ол шекті жүктеме кезінде ғана тапшылық пайда болатынын баса айтты. Мұндай кезде қажетті электр энергиясы басқа елдерден импортталады. Вице-министрдің айтуынша, жылыту маусымында жарықтың сөнуі күтілмейді.

Ал KEGOC басқарма төрағасы Нәби Айтжановтың айтуынша, шамамен 330 МВт көлемінде аздаған тапшылық бар.

"Бірақ бұл қазір Ресейден келетін ағын есебінен жабылып отыр. Жылыту маусымында станциялардың жөндеуден шыққанын ескере отырып, біз тапшылық болмайды деп болжап отырмыз. Жоспарланған көлемді Ресей есебінен жабамыз. 20 қазан күні "Мойнақ" ГЭС-і жөндеуден кейін іске қосылды. Жамбыл ГРЭС-інің қосымша блогы пайдалануға берілді. Өз қажеттілігімізді өзіміз жауып тұрмыз. Пайда болған тапшылықты Ресеймен маневр арқылы жабамыз", – деді Нәби Айтжанов Үкімет үйінде өткен баспасөз мәслихатында.

2024 жылға қарағанда елімізде электр энергиясын тұтыну көлемі сағатына 4 миллиард кВт-қа артқаны да айтылды. Бұл шамамен 4,2 пайызға тең.

"Бұл – айтарлықтай үлкен көлем. Бірақ биыл қосымша жаңа энергия көздері, оның ішінде жаңартылатын энергия көздері іске қосылды. Қазір солардың есебінен тапшылық толық жабылуда", – деп атап өтті KEGOC басқарма төрағасы.