Белгілі музыкатанушы, өнертану кандидаты, қазақтың дәстүрлі музыкасын зерттеуші және ұстаз Әлия Сабырова 58 жасында өмірден өтті, деп хабарлайды Skifnews.kz ақпарат порталы.

Әлия Сабырова отыз жылға жуық уақыт бойы дәстүрлі музыкалық мәдениеттер мен түркі әлемі музыкасына арналған пәндерді оқытты. Ол Қазақстанда алғаш рет «Әлем халықтарының музыкасы» атты оқу курсын жасап, авторлық бағдарламалар енгізді.

Ғалымның жетекшілігімен 50-ге жуық магистрлік және 3 докторлық диссертация қорғалды. Ол консерваторияның ғылым хатшысы, сондай-ақ қазақ және шетел музыка тарихы кафедрасының меңгерушісі қызметтерін атқарды.

«2009–2010 жылдары Әлия Сұлтанмұратқызы «Музыка әлемінде В мире музыки» журналының бас редакторы болды. Сонымен қатар, ол телебағдарламалар жүргізіп, ғылыми экспедицияларға қатысып, іргелі музыкалық еңбектерді редакциялады. Әлия Сабырованың ғылыми ізденістерінің өзегі Абай мен Шәкәрім шығармашылығы болды. Оның диссертациясы мен ғылыми мақалаларында қазақтың рухани және музыкалық дәстүрінің терең қабаттары жан-жақты зерттелді», — деп хабарлады Құрманғазы атындағы қазақ ұлттық консерваториясы.

Әріптестері Әлия Сұлтанмұратқызын еңбекқор, жаңашыл, кәсібіне адал ғалым ретінде сипаттайды. Ол студенттермен тең дәрежеде сөйлесіп, олардың дербес ойлау қабілетін дамытуға зор мән берді. Әр сабақта дәлдік пен ғылыми негізді талап етті.