Ақтөбелік спортшы қыз ауыр жарақаттан кейін бір жыл татамиге шықпаған.

Батыс Қазақстан облысында дзюдодан әлем кубогінің иегері, КСРО чемпионы Асқар Шайхиевті еске алуға арналған ашық республикалық турнир өтіп, 14 салмақ бойынша жеңімпаздар анықталды. Ал бас жүлде – темір тұлпардың иесі жеңімпаздар арасында лототрон тәсілімен анықталып, оның тізгінін ақтөбелік спортшы Гүлнұр Бақанова ұстады. Ол бір жыл бұрын алған жарақатынан емделіп, осы жарысқа қатысу арқылы үлкен спортқа қайта оралған болатын.

Айта кетейік, Асқар Шайхиевті еске алуға арналған самбо жарыстары 2020 жылға дейін үзіліссіз өткенімен, пандемиядан кейін тоқтап қалған болатын.

"Жергілікті дзюдо жанашырларының бастамасын басшыларымыз құп көріп, Оралдағы жаңа спорт аренасында жоғары деңгейде ұйымдастырдық. Бұл турнир дзюдодан Қазақстанда өтетін негізгі үш жарыстың қатарына еніп отыр. Осы турнирде топ жарған балуандарға "Спорт шебері" атағын беруді қарастырып, министрлікке өтінім жолдап қойдық. Дзюдошылар додасын өткізудегі басты мақсат – аталған спорт түрінің насихатын арттырып, жастарды спортпен шұғылдануға үндеу", – деді БҚО дзюдо федерациясының басшысы Рустам Шайхиев.

Болашақта Асқар Шайхиев атындағы дзюдо додасын құрлықтық жарыстардың күнтізбесіне қосу жоспарланып отыр. Ал биылғы турнирдің жүлде қоры 12 миллион теңгені құрады.

Турнирдің құрметті қонақтары қатарында Батыс Қазақстан облысының әкімі Нариман Төреғалиев, дзюдодан әлем чемпионы Максим Раков, БҚО дене шынықтыру және спорт басқармасының басшысы Бақдәулет Сәбитов, Қазақстан дзюдо федерациясының атқарушы директоры Айбек Имашовтар болды.

Оқи отырыңыз:

Grand Slam Ақтөбеде дзюдодан жақсы мектеп қалыптасқанын көрсетті – облыстық спорт басқармасы