Қазақстан әйелдер құрамасының бас бапкері Елдос Сайдалин алдағы Әлем кубогының финалына дайындық барысы мен команда құрамындағы өзгерістер туралы айтты, деп хабарлайды Skifnews.kz ақпарат порталы.

Әлем кубогының финалы 17–22 қараша күндері Үндістанның Нью-Дели қаласында өтеді. Бас бапкердің шешімі бойынша, Ливерпульде өткен 2025 жылғы әлем чемпионатының жеңімпаздары мен жүлдегерлері бұл жарысқа қатыспайды.

«Бізде 1-14 қараша аралығында оқу-жаттығу жиыны өтеді. Үндістанда өтетін Әлем кубогының соңғы кезеңіне әр салмақ дәрежесінен үш спортшыдан дайындаймыз. Барлығы бес үздік боксшы ел намысын қорғайды», — деді Елдос Сайдалин.

Сондай-ақ ол әлем чемпионатында өнер көрсеткен спортшыларға демалыс берілгенін атап өтті:

«Олар бұл жиынға қатыспайды. Желтоқсан айынан бастап қайта жаттығу процесіне қосылады», — деді бапкер.

Еске салайық, Ливерпульде өткен әлем чемпионатында Қазақстан әйелдер құрамасы жалпыкомандалық есепте бірінші орын иеленген болатын.