Қазір Ішкі істер министрлігі мен облыстық прокуратура қызметтік тексерісті бастады.

Түркістан облысында 71 жастағы туысқанынан балалы болған 15 жастағы қыздың ісі бойынша аудандық полицейлер тексеріліп жатыр. Себебі, жергілікті тәртіп сақшылары қылмыстық істі есептен алып тастаған көрінеді. Бұл туралы балалар омбудсмені Динара Закиева мәлімдеді, деп хабарлады 31 арнаның Информбюро ақпараттық бағдарламасы.

Айтуынша, оқушы қыз қаңтар айында Астана қаласына келіп босанған. Кәмелет жасына толмай ұлды болған жеткіншектің жағдайын дәрігерлер дереу елордадағы құзырлы органдарға хабарлапты. Олар істі Келес ауданына жолдаған.

Алайда аудандық полиция бөлімінің қызметкерлері бұл деректі номенклатуралық есептен алып тастаған дейді бала құқықтары жөніндегі уәкіл. Қазір Ішкі істер министрлігі мен облыстық прокуратура қызметтік тексерісті бастады.

Ал қызды зорлады деген күдікпен 71 жастағы туыс атасы қамауда отыр. Сұмдық оқиғаны естіген жұрт тергеліп жатқан зейнеткер отбасымен бірге Еңбекші ауылынан көшсін деген талап қойған болатын.