Германия билігі Ганновер әкімшілігінің Газа секторы мен Израильден 20-ға дейін науқас және жарақат алған баланы емдеуге қабылдау туралы ұсынысын қабылдамады, деп хабарлайды Egemen.kz TACC агенттігіне сілтеме жасап.

Елдің Ішкі істер министрлігі жолдаған хатта, қақтығысты тоқтату бағытындағы белгілі бір ілгерілеуге қарамастан, Газа секторындағы жағдайдың әлі де «аса күрделі және болжап білу мүмкін емес» екені айтылған. Ведомство балаларды шетелге шығару процесі көптеген қиын рәсімдерді қамтитынын, олардың жеке басын анықтау, отбасылық еріп жүрушілердің қауіпсіздігін қамтамасыз ету, шығын көлемін есептеу және емделуден кейін елге қайтару мүмкіндігін бағалау қажет екенін атап өтті.

Ганновер мэрі Белит Онай федералдық үкіметтің шешіміне өкініш білдіріп, бұл шешімді «жоғары дәрежеде көңіл қалдыратын әрі түсініксіз» деп атады. Оның айтуынша, қала билігі ерекше қорғанышқа мұқтаж балаларды қабылдауға толық дайын болған. Бастаманы Бремен, Дюссельдорф, Лейпциг, Бонн, Франкфурт, Киль қалаларының әкімшіліктері мен Төменгі Саксониядағы протестанттық шіркеулер де қолдаған еді.

Ал федералдық үкімет өз ұстанымында қалған. Басымдық зардап шеккендерге медициналық көмекті тікелей оқиға орнында көрсетуге беріледі, яғни науқастарды шетелге әкетпей, көмек сол жерде ұйымдастырылмақ.

Айта кетсек, бұған дейін ХАМАС Израильге қаза тапқан екі тұтқынның денесін қайтаруға уәде берген болатын.