Тергеуші, криминалист және түрме бақылаушысы онлайн-платформаларда бәс тігіп келген.
Солтүстік Қазақстан облыстық сотының мәліметінше, биыл наурыз айында аяқталған қызметтік тергеу нәтижесінде олардың букмекерлік платформаларда ставка жасағаны анықталды, деп хабарлайды inbusiness.kz сайты.
Полиция сержанты, уақытша ұстау изоляторының қызметкері Р. Сәлімов "1xBet" платформасына 2023 жылдан бастап жалпы сомасы 9 млн теңге мөлшерінде ақша салып, 4 млн теңге шешіп алған.
Сондай-ақ, оның "Olimpbet" платформасына 2020 жылы тіркеліп, бәс тігіп келгені анықталды. 2024 жылдан бастап "PariMatch" платформасында да ойнаған.
Криминалист А. Сүлейменов те 2020 жылы "Olimpbet" сайтында тіркеліп, 5 жыл ішінде 2 млн теңгеге жуық бәс тіккен, 1,3 млн теңге шешіп алған.
Ал тергеуші Қ. Нұржанов 2024 жылдың соңынан "PariMatch" платформасында 900 мың теңгеден астам ставка қойып, соның жартысына жуығын ұтқан.
Букмекерлік компаниялардан алынған материалдарда полицейлердің өз аты-жөндерімен, жеке куәліктерімен тіркеліп, верификациядан өздері өткені дәлелденген.
Тергеу қорытындысы бойынша үшеуін де қызметтен босату ұсынылып, 2025 жылғы 3 сәуірде Солтүстік Қазақстан облысы Полиция департаменті бастығының бұйрығымен олар жұмыстан босатылды.
Алайда экс-полицейлер маусымда жұмыстан босатудың заңсыз екенін танып, қызметке қайта алу, жұмыссыз жүрген уақыттағы жалақыны және тұрғын үй төлемдерін өндіру туралы талап арызбен сотқа жүгінді.
Петропавл қаласы № 2 сотының шешімімен А. Сүлейменов пен Р. Сәлімовтің талабы қанағаттандырылмады. Ал Қ. Нұржановты жұмыстан босату заңсыз деп танылып, оның күшін жою туралы шешім қабылданды.
Сондай-ақ, оның пайдасына 950 мың теңге жалақы мен 300 мың теңге шамасында тұрғын үй төлемін өндіру міндеттелді.
Алайда қыркүйек айында уақытша ұстау изоляторының қызметкері Сәлімов пен криминалист Сүлейменов облыстық сотқа апелляциялық шағым түсірді. Олар бірінші сатыдағы соттың шешімін қайта қарауды сұрағанымен, олардың өтініштері қанағаттандырылмады.
Апелляция барысында олардың бұрынғы әріптесі — тергеуші Нұржановтың есімі аталды. Облыстық соттың сот алқасы оған қатысты алғашқы шешімнің күшін жойды, яғни Нұржановтың қызметке қайта оралуы және оған төленген өтемақылардың барлығының күші жойылды.
