Матч бүгін, яғни 21 қазан күні 21: 45-те Алматының Орталық стадионда басталады.

Чемпиондар лигасының жалпы кезеңіндегі үшінші тур ойынында 3 ұпай қос командаға да ауадай қажет, деп хабарлайды inbusiness.kz сайты.

Қазақстандық "Қайрат" пен Кипрдің "Пафос" футбол клубтарының кездесуін Qazaqstan телеарнасы тікелей эфирде көрсетеді.

Бұған дейін бірінші турда алматылық ұжым сырт алаңда Португалияның "Спортинг" клубынан 1:4 есебімен ұтылса, екінші турда Алматыда "Реал Мадридтен" 0:5 есебімен ойсырай жеңілген болатын.

Ал Кипрдің "Пафосы" алғашқы ойында Грекияның "Олимпиакосымен" (0:0) тең тарқасса, одан кейін өз алаңында "Бавариядан" (Германия) 1:5 есебімен ұтылды.

"Қайрат" келесі кезеңдерде "Интер" (Италия), "Копенгаген" (Дания), "Олимпиакос" (Грекия), "Брюгге" (Бельгия) және "Арсеналмен" (Англия) кездеседі.

Күні кеше "Пафос" футбол клубының бас бапкері Хуан Карлос Карседо "Қайратқа" қарсы өтетін матч алдында командасына зор сенім білдірді.