2025 жылы елдің медициналық жоғары оқу орындары 10,5 мың маманды дайындап шығарды, олардың 34%-ы ауылдық медициналық ұйымдарға бөлінді – бұл өткен жылмен салыстырғанда шамамен екі есе көп, деп хабарлайды Zakon.kz.

Өңірлердің қажеттіліктерін ескере отырып, биыл 5 мыңнан астам білім гранты бөлінді. 2024 жылдың қазан айынан бастап ауылдық жерлерде жұмыс істейтін 16 аса тапшы мамандық бойынша 254 дәрігерге 8,5 млн теңге көлемінде біржолғы төлем берілді, ал 2025 жылы тағы 105 маман осындай қолдауға ие болды.

Қабылданған шаралардың нәтижесінде ел бойынша дәрігерлер тапшылығы 19%-ға, орта буын медицина қызметкерлері тапшылығы 13%-ға азайды. Ауылдық жерлерде кадр жетіспеушілігі 17%-ға төмендеді.

1 қыркүйектен бастап интернатурада алты негізгі мамандық (соның ішінде терапия, педиатрия және хирургия) бойынша, сондай-ақ резидентурада 14 педиатриялық бағыт бойынша дайындық басталды.

Дәрігер кадрларын даярлау сапасын арттыру мақсатында оқу бағдарламалары қайта қаралды – базалық пәндер саны 10 кредитке көбейтілді, халықаралық стандарттар енгізілуде. 1 қыркүйектен бастап алғаш рет Қарағанды медицина университеті мен Қазан федерал университеті арасында қос дипломды бағдарлама іске қосылды, оған 70 студент қабылданды. Сондай-ақ Пәкістан медицина университетінің филиалын ашу мәселесі қарастырылуда.

Медицина қызметкерлерін қорғау үшін Денсаулық сақтау қызметкерлеріне шабуыл жасағаны үшін Қылмыстық кодекске жеке бап енгізу бастамасы көтерілді. ІІМ-мен бірлесіп іс-қимыл жоспары әзірленді: медициналық ұйымдарда 152 полиция бекеті орнатылған. Сонымен қатар мемлекеттік медициналық ұйымдардың 98%-ы және жекеменшік мекемелердің 76%-ы кәсіби жауапкершілікті сақтандыру бойынша 3,1 млрд теңгеге шарттар жасасты.

Бұған дейін Қазақстанда дәрілік заттар мен медициналық бұйымдарды сату ережелерінің өзгеретіні хабарланған болатын.