Алматы полициясы "Қайрат" – "Пафос" ойыны қарсаңында қауіпсіздік шараларын күшейтті хабарлайды Polisia.kz порталына сілтеме жасаған KAZ.NUR.KZ.

Медиа-порталдың жазуынша, алматылық полицейлер Орталық стадионда өтетін "Қайрат" пен "Пафос" командалары арасындағы халықаралық футбол матчы кезінде жанкүйерлердің қауіпсіздігі мен тәртіпті қамтамасыз етеді.

Полиция департаментінің қызметкерлері қоғамдық тәртіпті сақтау мен трибуналардағы бақылаудан бастап, спорт нысаны маңындағы жол қозғалысын реттеуге дейінгі барлық бағытта жұмылдырылады.

Сондай-ақ матч кезінде көлік қозғалысына ішінара шектеулер енгізілуі мүмкін. Осыған байланысты полиция өкілдері қала қонақтары мен тұрғындарға өз бағыттарын алдын ала жоспарлап, уақытша шараларға түсіністікпен қарауға шақырады.

"Алматы полициясы футбол кешінің тыныш әрі жайлы өтуі үшін барлық қажетті шараны қабылдап отыр. Мұндай іс-шаралардағы қауіпсіздік тек тәртіп сақшыларына ғана емес, азаматтардың жауапкершілігіне де байланысты. Жанкүйерлерден тәртіп сақтап, полициямен өзара ынтымақтастық танытуды сұраймыз", — деді Алматы қалалық ПД қоғамдық қауіпсіздік басқармасы бастығының орынбасары Тимур Ноғайбаев.

Полиция өкілдері қабылданып жатқан барлық шараның басты мақсаты спорттық мереке кезінде қауіпсіздікті қамтамасыз ету және қоғамдық тәртіпті сақтау екенін еске салды.

Айта кетелік, "Қайрат" – "Пафос" матчы 21 қыркүйекте Алматының Орталық стадионында өтеді. Ойын жергілікті уақытпен сағат 21:45-те басталады.

Мәтіннен қате тапсаңыз, бізге жазыңыз