Байрақты бәсекеге еліміздің 20 өңірінен 371 спортшы қатысуда.

2024 жылғы Олимпиаданың күміс жүлдегері Нұрбек Оралбай жарақатына байланысты бокстан Қазақстан чемпионатына қатыспайтын болды. Бұл туралы ұлттық құраманың аға жаттықтырушысы Асқар Еркебаев хабарлады.

– Нұрбек Оралбай жарақат алды. Сол себепті ел чемпионатына қатыса алмайды. Бірақ 80 келіге дейінгі салмақ дәрежесінде ол тек Қазақстандағы ғана емес, әлемдегі ең үздік боксшылардың бірі. Дегенмен, соған арамастан, чемпионаттағы бәсекелестік жоғары деңгейде, – деді Еркебаев.

Естеріңізге сала кетсек, Оралбай қыркүйек айында Ливерпульде (Англия) өткен World Boxing ұйымдастырған 2025 жылғы әлем чемпионатында ширек финалға дейін жетіп, өзбекстандық Жавохир Умматалиевке жол берген болатын.

Айта кетейік, бүгін 16 қазан Семей қаласында бокстан Қазақстан чемпионатының екінші жарыс күні өтеді. Күндізгі жекпе-жектер сессиясы сағат 14:00-де, ал кешкі сессия сағат 18:00-де басталады. Жекпе-жектерді тікелей эфирде Qazsport арнасынан тамашалауға болады.

Бүгін рингке Қазақстан құрамасының көшбасшы боксшыларының бірі – 57 келі салмақ дәрежесінде өнер көрсететін Абылайхан Жүсіпов шығады. Ол Азия чемпионаттарының екі дүркін күміс жүлдегері (2017 және 2021 жылдары) және әлем чемпионаттарының үш мәрте қола жүлдегері (2017, 2019 және 2021).

Сондай-ақ 90 келіден жоғары салмақ дәрежесінде өнер көрсететін ағайынды Нұрлан мен Даниял Сапарбай рингке шығады.

Қатысушылар қатарында Токио–2020 Олимпиадасының қола жүлдегері, 2021 жылғы әлем чемпионы Сәкен Бибосынов та бар. Бұған дейін ол чемпионатқа қатыспайды деген ақпарат тараған болатын. Дегенмен былғары қолғап шебері бүгін кешкі сессияда шаршы алаңға шығады.