Мәжіліс депутаты Асхат Аймағамбетов 2025 жылғы 15 қазанда парламент кулуарында мұғалімдерді мектеп чаттарына қатысу және Reels бейнероликтерін түсіру міндетінен босатуды ұсынды, деп хабарлайды Zakon.kz тілшісі.

Оның айтуынша, қазіргі таңда әрбір тәрбие шарасы мұғалімдерге Reels түсіру талабы қойылумен өтеді.

"Егер видео немесе фотосурет болмаса, демек, ештеңе өткізілмеген сияқты көрінеді. Бұл не сонда? Бұл – баланың бейнесіне қатысты құқық. Мысалы, мен өз мектебімде: "менің баламды түсірмеңіздер" деп айттым. Барлық ата-аналарға да соны ұсынар едім – балаларды олардың келісімінсіз түсіруге болмайды. Қазіргі жасанды интеллект дәуірінде бұл өте қауіпті: дипфейк сияқты технологиялар осындай деректерді пайдалана алады. Қазір дерек – екінші мұнай іспетті. Мұндай ақпарат қалай қолданылатынын кім біледі?" – деді депутат.

Асхат Аймағамбетовтің пікірінше, ата-ананың келісімінсіз баланы түсіру – құқық бұзушылық, ал мұғалімдерді Reels түсіруге және жазба жариялауға мәжбүрлеу – олардың құқықтарын бұзу болып табылады.

Бұған дейін депутат мектептерге жасөспірімдер арасындағы құқық бұзушылықтардың алдын алу бойынша артық жауапкершілік жүктелмеуі тиіс екенін айтып, мектеп инспекторларын қайта енгізу қажеттігін атап өткен еді.