Жетісу облысында полицейлер заңсыз ет тасымалы фактілерін анықтады. Тәртіп сақшылары Мақаншы – Алматы бағытындағы жолаушылар автобусын тоқтатып, көліктің жүк салғышынан 100 ұсақ және 2 ірі қара малдың етін тапты, деп хабарлайды KAZ.NUR.KZ ІІМ-нің Polisia.kz ақпараттық медиа-порталына сілтеме жасап.

Басылымның хабарлауынша, облыс аумағында "Мал ұрлығы" республикалық жедел алдын алу іс-шарасы өтіп жатыр. Іс-шараның мақсаты – мал ұрлығына байланысты қылмыстардың алдын алу және оларды ашу, сондай-ақ ет және ет өнімдерін тасымалдау мен сату кезінде құқық бұзушылықтарды анықтау.

Бар болғаны екі күннің ішінде полицейлер мал ұрлығына қатысты екі қылмыстық істі тіркеп, бұған дейін ашылмаған төрт қылмысты әшкереледі. Профилактикалық іс-шара аясында ет және ет өнімдері сатылатын 69 нысан мен ет тасымалдаған 83 көлік тексерілді.

Тексеру нәтижесінде тиісті құжаттарсыз өнім тасымалдаудың бес дерегі және ветеринариялық ережелерді бұзудың 43 жағдайы анықталды. Абай облысынан жолға шыққан Мақаншы – Алматы бағытындағы жолаушылар автобусының жүгін тексеру барысында 100 ұсақ және 2 ірі қара малдың еті табылды. Жүргізуші етті Алматы қаласындағы базарлардың біріне жеткізіп беру үшін алғанын айтқан. Аталған дерек бойынша материал ветеринариялық инспекцияға жолданды.

Полицейлер "Мал ұрлығы" іс-шарасы аясында кешенді тексерістерді жалғастырады. Тәртіп сақшылары азаматтарды ет және ет өнімдерін тасымалдау мен сату кезінде заң талаптарын қатаң сақтауға, сондай-ақ мал ұрлығына қатысты күмәнді деректер туралы дер кезінде полицияға хабарлауға шақырады.

Мәтіннен қате тапсаңыз, бізге жазыңыз