Маңғыстау облысында жүрегі сыр берген бала көбейіп барады.

Аймақта 336 мыңнан астам жеткіншек медициналық бақылауда тұр. 9 мыңға жуығы туабітті дертке шалдыққан. Оған қоса шалғай өңірде балаларды емдейтін кардиолог-дәрігер, медициналық құрал-жабдық жетіспейді.

Мөлдір Жұматаева құрсақтағы сәбиінің жүрек ақауы барын медициналық тексеру кезінде білген. Нәрестеге 3 айлық кезінде операция жасалды. Ал бір жасқа толғанда күрделі емдік шараны Астанада квота арқылы қайталап жасатты. Қазір баланың жағдайы жақсы.

Мөлдір Жұматаева, Жаңаөзен қаласының тұрғыны:

- Шүкір жақсы. Біз 3 ай сайын, 6 ай сайын барып тұрамыз Астана қаласына, қаралып тұрамыз. Өздері де келіп тұрады. Тегін жоспарлы түрде қарап, кәдімгі емдерін беріп дәрілерін беріп, сөйтіп кетеді. Замира Артықбайқызына рахметім шексіз. Осы баламды аман алып қалды.

9 жастағы Ерболат Нариманның мұрнынан жиі қан кетуінен жақындары емханаға әкелген. Жүрек қызметінің бұзылғаны анықталған соң шұғыл операция жасалып, жеткіншек аман қалды. Облыстың бас балалар кардиолог-дәрігері Замира Алпысбаева «диагноз неғұрлым ерте қойылса, бала өмірін сақтап қалуға мүмкіндік те арта түседі», дейді.

Замира Алпысбаева, Маңғыстау облысының бас балалар кардиолог-дәрігері:

- Диагнозды қою үшін бірінші Астана қаласына қаласына жіберуіміз керек. Осы балаға 6 айында немесе 7 айында квотамен операцияға келуі керек деген қорытынды беруі керек. Бізде қазіргі таңда кардиохирург мамандар өздері Маңғыстау облысына келіп, операцияға баратын мерзімін белгілеп, сол күнге квотаға дайындауды тағайындап кетеді бізге. Балаларымыз ОСМС жүйесі бойынша тегін операциясын жасатып келіп жатыр.

Өңірде жүрек-қан тамырлары ауруларын емдейтін құрал-жабдық та, маман да тапшы. Мысалы, Жаңаөзенде, Қарақия және Бейнеу ауданында 6 кардиолог-дәрігердің орыны бос тұр. Оларды өзге өңірлерден шақырту бойынша жұмыс жасалып жатыр. Балаларда туа біткен жүрек ақауы елде жиі тіркелетін сырқаттың бірі. Ресми деректерге сүйенсек, Қазақстанда 380 мыңнан астам кәмелетке толмаған балаға осындай диагноз қойылған.

Талғат Исламұлы, Ренат Досалиев