Қазақстан Қытай туристері арасында қонақ үйлерді броньдау бойынша үлкен сұранысқа ие топ-5 елдің қатарына кірді. Бұл туралы Қазақстан Туризм және спорт министрлігі Туризм индустриясы комитетіне сілтеме жасаған KAZ.NUR.KZ хабарлайды.

Комитет мәліметінше, Қазақстан Қытайдың туристік нарығында өз позициясын нығайтып жатыр. Tongcheng Travel ірі онлайн-туристік компаниясының деректеріне сәйкес, біздің еліміз Қытайда Ұлттық күн мен Күздің ортасы мерекесін атап өтуге арналған 8 күндік демалыста халықаралық қонақ үйлерді броньдаудың ең жоғары өсімі байқалған 5 шетелдік бағытқа кірді.

Биыл Қытайда шетелге ұзақмерзімді топтық турларға қызығушылық артып келеді. Олардың саны жылдық көрсеткішпен салыстырғанда екі есеге жуық өсті. Мереке күндері Қытай туристері тарабынан Орталық Азия, Таяу Шығыс және Африканың бірқатар елінде халықаралық қонақ үйлерді броньдау едәуір көбейгені байқалады. Сұраныстың өсімі бойынша көшбасшылар бестігіне Сауд Арабиясы, Мысыр, Жаңа Зеландия, Қазақстан және Біріккен Араб Әмірліктері кірді.

“Қазақстан Қытай аудиториясы үшін тартымды бағытқа айналып жатыр. Биыл 9 айда ғана елімізге Қытайдан келушілер қатары 675 мыңнан асты. Ал өткен жылдың 12 айында бұл көрсеткіш 655 мың адамды құраған болатын. Бұл — елімізге деген жоғары қызығушылықты және Қытайдың туристік нарығында елімізді ілгерілету, визалық рәсімдерді жеңілдету және екі ел арасындағы тікелей әуе қатынастарын кеңейту бойынша жүйелі жұмыстың тиімділігін көрсетеді", — деді Kazakh Tourism ҰК АҚ Басқарма төрағасының міндетін атқарушы Даниел Сержанұлы.

Атап өткен жөн, Қытай ірі іздеу жүйесі Baidu деректеріне сәйкес, 2025 жылғы қыркүйекте Қазақстан жайлы ізденістер саны тәулігіне орта есеппен 420–430 мыңды құраған. Ең жоғары белсенділік Гуандун мен Чжэцзян провинцияларында, Бейжің қаласында, Шыңжаң-Ұйғыр автономиялық ауданында және Шандун провинциясында байқалды. Бұл Қазақстанға деген қызығушылық шекара маңындағы аумақтармен шектелмей, Қытайдың экономикалық тұрғыдан дамыған өңірлерін де қамтығанын көрсетеді.

Мәтіннен қате тапсаңыз, бізге жазыңыз