Ерейментау ауданында жаппай улану дерегі тіркелді , деп хабарлайды Egemen.kz.

Оқиға аудандық аурухананың жұқпалы аурулар бөлімшесіне бірдей белгілермен жеті адам түскеннен кейін белгілі болған. Алдын ала тексеру нәтижесіне сәйкес, олардың жағдайының нашарлауына тағамнан улану себеп болуы мүмкін.

«Ерейментау ауданының учаскелік полиция инспекторы оқиға туралы тиісті қызметтерге дереу хабарлаған. Тергеу барысында зардап шеккендердің барлығы бір іс-шараға қатысқаны анықталды. Аталған факті бойынша «Санитарлық ережелерді немесе гигиеналық нормативтерді бұзу» бабы бойынша сотқа дейінгі тергеу басталды. Құқық қорғау органдары уланудың көзін және кінәлі тұлғаларды анықтап жатыр», делінген Ақмола облысы полиция департаментінің баспасөз қызметі таратқан хабарламада.

Айта кету керек, биылғы жылдың басынан бері ауданда санитарлық нормалардың бұзылуына байланысты осыған ұқсас екі жағдай тіркелген.