Түркістан қаласында облыс аумағындағы барлық деңгейдегі мәслихат депутаттары арасында кіші футболдан облыстық біріншілік басталды. Жарыстың ашылу салтанатына Түркістан облысының әкімі Нұралхан Көшеров пен облыстық мәслихат төрағасы Нұралы Әбішов қатысты.

Өңір басшысы салауатты өмір салтын дәріптеп жүрген халық қалаулыларын құттықтап, қатысушы командаларға сәттілік тіледі.

– Бүгін өңірде спортсүйер депутаттардың қатысуымен ауқымды жарыс өтуде. Аудан және қала мәслихаттарынан келген мықты командалар кіші футбол бәсекесінде өзара бақ сынауда. Бұл – тек спорттық жарыс қана емес, өңір бірлігін нығайтатын және салауатты өмір салтын насихаттайтын маңызды іс-шара. Мемлекет басшысы Қасым-Жомарт Кемелұлы Тоқаев өз Жолдауларында бұқаралық спортты дамытуға ерекше көңіл бөліп келеді. Осы бағытта облысымызда жүйелі жұмыстар жүргізіліп, спорт инфрақұрылымы кезең-кезеңімен жаңартылып жатыр. Қала мен ауылдарда заманауи спорт алаңдары мен жаттығу орталықтары ашылуда. Бұқаралық спортты дамыту қарқыны жылдан жылға артып келеді. Мысалы, Бекзат Саттарханов атындағы спорт кешені мен ескек есу кешені халық игілігіне қызмет етуде. Сонымен қатар, биылғы 8 айдың қорытындысы бойынша Түркістан облысы экономикалық өсім бойынша үздіктер қатарында. Бұл – барлық деңгейдегі мәслихат депутаттарымен бірлесіп атқарылған еңбектің нәтижесі. Еліміз өркендеп, Түркістанымыз дами берсін. Қатысушыларға сәттілік тілеймін, – деді Нұралхан Көшеров.

Биылғы облыстық біріншілікке барлық аудан мен қала мәслихаттарының депутаттарынан жасақталған 18 команда қатысуда. Алғашқы турда облыстық мәслихаттың командасы сарыағаштық әріптестерінен басым түсті.

Айта кетейік, жарыс жеңімпазына 1 миллион теңге көлемінде жүлде табысталады. Сонымен қатар, жүлдегер командалар мен жеке шеберлігімен көзге түскен қатысушыларға да қомақты қаржылай сыйақылар қарастырылған.