Үкіметте өткен брифингте ұлттық экономика вице-министрі ҚҚС-қа байланысты ипотекалық несие мөлшерлемесі 30 пайызға дейін көтеріледі деген сарапшылардың болжамына қатысты ойын айтты, деп хабарлайды KAZ.NUR.KZ тілшісі.

"Біріншіден, жылжымайтын мүліктің бағасы нарықтық жағдайға байланысты. Сіз ҚҚС мөлшерлемесін айтып отырсыз. 2026 жылдан бастап кем дегенде алдағы бір жарым жыл ішінде ҚҚС үй бағасына әсер етпейді, өйткені біз өтпелі кезеңді ойластырдық.

Бізде 2001 жылдан бері жылжымайтын мүлікке ҚҚС салынбаған, сонда да баға өсіп жатыр. Яғни, бұл нарық. Біз бұл норманы енгізген кезде баға өсетінін түсіндік, сондықтан біз өтпелі кезеңді ойластырдық. ҚҚС құрылысты 2026 жылдың 1 қаңтарынан кейін бастағандарға ғана қатысты болады", — деді Ұлттық экономика вице-министрі Азамат Әмрин.

Ол құрылысқа тағы бір жыл кететінін, сондықтан ҚҚС пәтер бағасына 2027-2028 жылдары әсер ететінін айтты.

"Сондықтан ҚҚС себеп болмайтынын түсінуіміз керек. Ипотека мөлшерлемесіне келетін болсақ, менің ойымша, бұл жерде нарық жауап береді, нарықтық жағдайдың әсері басым болады. Өйткені әр банк өз мөлшерлемесін реттеп, әртүрлі шарт ұсынады. Бұл жерде де нарықтық жағдайдың әсері басым болады", — деді вице-министр.

Мәтіннен қате тапсаңыз, бізге жазыңыз