Жыл сайын полиция қатарына 6 мың қызметкер қабылданады .

Ішкі істер министрі Ержан Сәденов полиция қызметкерлерінің барлығы бірдей антына адал емес екенін мойындады, деп хабарлайды inbusiness.kz сайты.

Бақытжан Базарбек кейбір учаскелік инспекторлардың өзі қылмыстық істің фигуранты атанғанын баса айтты.

"Мәселен, Ақтөбеде инспектор 1 млн теңге талап еткен. Солтүстік Қазақстанда учаскелік инспектор алаяқтық үшін сотталды. Жетісу облысында инспектор 24 млн теңгенің заттай айғақтарын қолды еткен. Ал Шымкентте инспектор ақша үшін боди-массаж салонына "қамқорлық көрсеткен". БҚО-да учаскелік инспектор қол көтерген. Қарағандыдағы тірек пунктінде әйел адамның денесі табылды, учаскелік инспектордың өзі есі-түссіз күйде болған. Себебі неде? Министрлік бұл жағдайлардың қайталанбауы үшін не істеп жатыр?", – деді депутат көшпелі Үкімет сағатында.

Ішкі істер министрі Ержан Сәденов мұндай жағдайлардың бар екенін айтты.

"Айтылған деректер бұл бір жылдың ішінде болған оқиғалар емес. Ақтөбедегі жағдай 2017 немесе 2018 жылы болған. Мәселе онда емес. Өкінішке қарай, полиция қызметкерлерінің барлығы бірдей антына адал емес. Оның ішінде учаскелік инспекторлар да бар. Сіз айтқан деректер болды. Екі нәрсеге тоқталсам деймін. Біріншіден, бұл ауыр жағдай. 2018 жылдан бастап бізде бакалавриат алынып тасталған. Жыл сайын полиция қатарына 6 мыңдай қызметкер қабылданады. Неге? Себебі бірі зейнетке шығады.

Бізде 4 академия болған. Қазір 5 академия бар. Бір институт пен екі оқыту орталығы курсанттар даярлайтын. 4 жыл бойы офицерлерді даярлайтын. 2018 жылы бакалавриатты алып тастау туралы шешім қабылданды. Жылына 200 кадрлық офицер ғана даярланатын, қалғанын институттардан тартып, 1-2 айдың ішінде қайта даярлаудан өтетін. Екі айдың ішінде адамды полицейге айналдыру мүмкін емес", – деп жауап берді ол.

Ведомство басшысының айтуынша, 2028 жылдан бастап жыл сайын мыңнан аса түрлі бағыттағы курсанттар дайындалатын болады. 2031 жылға қарай бұл көрсеткіш 1800-ге барады.