Шымкентте 20 қазанынан бастап Business.enbek.kz порталында бизнес идеяларды іске асыруға арналған қайтарымсыз гранттарға өтінім қабылдау басталады. Бұл туралы қала әкімдігіне сілтеме жасаған KAZ.NUR.KZ хабарлайды.

Ведомствоның мәліметінше, кезекті үшінші лекте 93 адамға 400 АЕК (1 572 800 теңге) көлемінде қайтарымсыз грант беру жоспарланып отыр.

Өтінімді жұмыссыз ретінде тіркелген тұрғындар, жеке кәсіпкерлер (тіркеу мерзімі 3 жылдан аспауы тиіс) бере алады.

Үміткерлер келесі әлеуметтік санаттардан болуы шарт:

• мүгедектігі бар тұлғалар;
• көпбалалы немесе аз қамтылған отбасы мүшелері;
• "қандас" мәртебесі бар азаматтар;
• мүгедек баланы тәрбиелеп отырған жандар;
• асыраушысынан айырылғандар;
• өңіраралық қоныс аударушылар.

Бұдан бөлек, "Бастау Бизнес" жобасы шеңберінде соңғы 3 жылда кәсіпкерлік негіздері бойынша оқығаны туралы сертификаты болуы қажет.

Өтінім беру үшін:

• порталда тіркелу;
• грант шарттарына сәйкестікті растау;
• бизнес-жоспарды толтыру;
• өтінішке ЭЦҚ арқылы қол қою қажет.

Сондай-ақ мансап орталықтары немесе ХҚКО-дағы өз-өзіне қызмет көрсету аймақтары арқылы да өтініш беруге болады.

"Қаражатты құрал-саймандар мен жабдықтар, мал, тұқым, көшет сатып алуға және жалға алу шығындарын жабуға жұмсауға болады. Грант иегерлерін комиссия өкілдері іріктейді. Үміткер өз жобасын комиссия алдында қорғайды", — делінген хабарламада.

Бағалау мынадай критерийлер бойынша жүргізіледі:

• бизнес идеяның бәсекеге қабілеттілігі;
• өткізу нарығының нақтылығы;
• қаржылық өміршеңдік;
• жаңа жұмыс орындарын құру әлеуеті.

"Комиссия шешімі порталдағы жеке кабинетке жіберіледі. Қолдау тапса, келісім жасалып, қаражаттың жұмсалуы бойынша электронды форматта тоқсан сайын есеп беріледі", — делінген хабарламада.

Мәтіннен қате тапсаңыз, бізге жазыңыз