Оның 475 мыңы Жедел басқару орталығына қосылған.

Ішкі істер министрі Ержан Сәденов көшедегі қауіпсіздік күшейтіліп жатқанын айтты, деп хабарлайды inbusiness.kz сайты.

"Күштерді көбейттік, патруль тығыздығын арттырдық. Ендігі назар – саябақтар мен аула қауіпсіздігі. Халық көп жиналатын орындарда дабыл түймелері мен стационарлық бекеттер орнатылды. Бейнебақылау жүйелері дамып келеді. Бюджетке салмақ салмай, әртүрлі меншіктегі камераларды қосып жатырмыз", – деді министр Үкімет сағатында.

Қазір қоғамдық орындарда 1,5 млн камера жұмыс істейді. Оның 475 мыңы Жедел басқару орталығына қосылған. ІІМ басшысы бұл жұмыс жалғасатынын жеткізді.

"Сауда орталығы мен базардан бастап, вокзал мен әуежайға дейін ірі нысандарды қамтып жатырмыз. Мектеп, кіреберіс, лифт және автобустар қосылуда. Нәтижесі айқын. Қылмыстардың 58%-ы солардың көмегімен ашылды. 523 мың әкімшілік құқықбұзушылық-тың жолы кесілді. Барлық облыс орталықтарында Жедел басқару орталығы бар. Енді аудандарға дейін жеткізіп жатырмыз", – деп атап өтті Ержан Сәденов.

Айта кету керек, бұған дейін егемендік алғаннан бері қылмыс саны екі есе төмендегенін жазғанбыз. Кейбір қылмыс түрлері үшін жаза айтарлықтай күшейген.