Жанкүйерлер асыға күткен жекпе-жек желтоқсан айында өтуі мүмкін .

Орта салмақта IBF және WBO нұсқалары бойынша әлем чемпионы Жәнібек Әлімханұлы (17-0, 12 KO) WBA белбеуінің иегері, кубалық Эрисланди Ларамен (31-3-3, 19 KO) жекпе-жек өткізуге біртабан жақын.

Қазақстандық боксшының өкілі Берік Сұлтанның айтуынша, Әлімханұлы жекпе-жек өткізуге келісімшартқа қол қойды. Енді кезек 42 жастағы Ларада.

"Тарихи жекпе-жек, орта салмақтың додасын қайнататын жекпе-жек, күллі қазақ жұрты асыға күткен жекпе-жектің келісімшартына қол қойдық. Жақында промоутерлік компаниялар ресми жариялайтын болады. Алдымызда үлкен шоу күтіп тұр. Біздің төрт титулды жинаймыз деген мақсатымыздың бел ортасынан астық. Тарих жасаймыз. Осы жолда еңбек етіп жатырмыз. Еңбектің де жемісін көретін күн алыс емес. Осы қуанышты жаңалықпен сіздермен алдын ала бөлісуді жөн көрдім!", — деді Берік Сұлтан әлеуметтік желіде.

Бұған дейін Әлімханұлы мен Лараның жекпе-жегі 6 желтоқсан күні АҚШ-тағы Сан-Антонио қаласында (Техас штаты) өтетін бокс кешінің аясында ұйымдастырылуы мүмкін екені хабарланған болатын.

Айта кетейік, бұл салмақтағы төртінші белбеу WBC нұсқасы бойынша доминикандық Карлос Адамеске (24-1-1, 18 KO) тиесілі. Ол бұған дейін Әлімханұлымен жекпе-жек өткізуден бас тартты.