Ұлттық құраманың турнирлік кестедегі жағдайы қалай?

10.10.2025

Ғалымжан Кенжебек бүгінгі матчтың үздік ойыншысы атанды.

Қазақстан құрамасы 2026 жылғы әлем чемпионатының іріктеу кезеңі аясында өз алаңында Лихтенштейн командасын 4:0 есебімен ойсырата жеңді.

Талғат Байсуфинов жаттықтыратын команда ірі жеңіске Ғалымжан Кенжебектің (26 және 59-минуттар), Бақтиер Зайнутдиновтың (28-минут) және Әлібек Қасымның (81-минут) голдарының арқасында жетті.

Айта кетейік, матчтан кейін Ұлттық құраманың бас бапкерінің міндетін атқарушы Талғат Байсуфинов матчқа қатысты пікір білдірді.

— Жеңіспен құттықтаймын. Біз сегіз күн бойы жаттықтық. Әрине, төрт гол соқтық. Жоспарымыздың көбін жүзеге асырдық деп айтуға болады. Алда әлі көп жұмыс бар. Бүгін кешке бейнежазбаларды қарап, талдау жүргіземіз және Македониямен ойынға дайындықты бастаймыз.

Айта кету керек, біз ойыншыларға ұсынған жаңа тәсілдер мен талаптар оларға ұнады — мұны жанкүйерлер де байқады. Футболшылар бәрін дұрыс түсініп, допты жақсы бақылап, өзара комбинацияларда сенімді ойнады. Дегенмен, жетілдіретін тұстар әлі де бар, — деді Талғат Байсуфинов.

Осылайша, Қазақстан құрамасының еншісінде қазір алты ұпай бар, алайда оның топтағы жағдайы өзгерген жоқ — команда бес құраманың ішінде бұрынғысынша төртінші орында тұр.

Қазіргі таңда J тобындағы турнир кестесі келесідей:

Солтүстік Македония — 11 ұпай (5 матч),

Бельгия — 10 ұпай (4 матч),

Уэльс — 10 ұпай (5 матч),

Қазақстан — 6 ұпай (6 матч),

Лихтенштейн — 0 ұпай (6 матч).

13 қазан күні ұлттық құрамамыз әлем чемпионатына іріктеу аясында Солтүстік Македонияға қарсы алаңға шығады.

https://www.sports.kz/news/talgat-baysufinov-prokommentiroval-razgrom-vmatche-kazahstan-lihtenshteyn

Related to this topic:

Latest to this topic: