Қостанайда уролог-хирург Антон Кистановты cоққыға жықты деп айыпталған ер адамға үкім шықты. Ол алты айға бас бостандығынан айырылды. Бірақ тергеу изоляторында өткізген уақытын есепке алғанда енді ол жазасын екі аптадан аз уақытта өтеп бітіреді, деп хабарлайды KAZ.NUR.KZ ТоболИнфо-ға сілтеме жасап.
Бүгін, 10 қазанда Қостанайдың №2 соты Қостанай облыстық ауруханасының урологы Антон Кистановқа соққы жасады деген 34 жастағы ер адамға қатысты үкім шығарды.
Судья Анара Шаймұрынова айыпталушыға Қазақстан Республикасы Қылмыстық кодексінің 114-бабы, 3-бөлігі (Абайсызда денсаулыққа ауыр зиян келтіру) бойынша 6 айға бас бостандығынан айыру жазасын тағайындап, оны жалпы режимдегі түзеу колониясында өтеуге үкім етті.
Сотталған ер адамның 2025 жылдың 17 шілдесінен бастап тергеу изоляторында отырған уақыты оның жаза мерзіміне қоса есептеледі, осылайша тергеу изоляторындағы бір күн колониядағы екі тәулікке тең болады. Бұл ер адамның жаза мерзімінің аяқталуына шамамен 12 күн қалды дегенді білдіреді.
Сондай-ақ ол жәбірленушілердің өтемақы қорына 39 000 теңге және жәбірленуші Антон Кистановқа қосымша 2,5 млн теңге төлеуге тиіс. Оның азаматтық талап арызы толығымен қанағаттандырылды.
Судья Анара Шаймұрынова сотталушыға шығарылған жазаны түсіндірді. Сотталушы дәрігердің ерін тұсынан ұрған, бұл жекелей алғанда ауыр дене жарақаты емес, алайда Кистанов өз бойымен шамалас биіктіктен құлап, басын еденге соғу салдарынан ауыр жарақат алған.
Жоғарыда аталған жарақаттар жиынтығы бойынша ауыр дене жарақаты болып есептеледі, бірақ сот жауапкердің жарақаттау ниеті болмаған деп есептейді. Оның кінәсі қылмыстық абайсыздық ретінде бағаланады; сотталушы өз әрекетінің салдары қауіпті болатынын болжай алмаған.
Бұл кішігірім құқық бұзушылық болып саналады. Бұл бап бойынша ең жоғары жаза бір жыл бас бостандығынан айыру. Алайда бұл жазаның өзі сотталушының 2018, 2012, 2023 жылы туған кәмелетке толмаған үш баласы болуына байланысты қысқартылған.
"Сотталушы өз кінәсін мойындағанымен, өкінген жоқ. Ол болған оқиғаға дәрігерді кінәлап, жәбірленуші өзінің басына түскен жағдайға лайық екенін айтты. Алайда Кистанов өзін дұрыс ұстады, науқасты арандатпады. Іс бойынша ауырлататын мән-жайлар анықталған жоқ", — деп қорытындылады сөзін Анара Шаймұрынова.
Мәтіннен қате тапсаңыз, бізге жазыңыз
