
Шымкентте жол айрығы салынады. Оған қала бюджетінен 10 млрд теңге бөлінді. Жоба көлік кептелісін азайту мақсатында қолға алынды. Қазір қаладағы жол қозғалысын «ақылды» бағдаршамдар реттеп тұр. Жасанды интеллект элементтері енгізілген құрылғылар аяқ асты істен шыға қалса, қосалқы энергия көздерінен қуат алады.
«Жоба жүзеге асқан кезде көлік кептелісі азайып, жүргізушілер уақытын үнемдейді», — дейді жауаптылар.
Ролан Ибрагимов, қалалық жолаушылар көлігі және автомобиль жолдары басқармасының басшысы:
- Биыл Бәйдібек би мен Төлеметов көшесі жоспарланып отыр. Арғынбеков және Бәйдібек би сияқты күрделі болмайды. Яғни Момынов көшесі сияқты болады. Бәйдібек би жоғары өтеді, ал Төлеметов көшесі айналма — кольцевое қозғалыспен астымен өтетін болады. Келесі жылы бітіруді жоспарлап отырмыз.
Қалада көлік қозғалысын «ақылды» бағдаршамдар реттейді. Жасанды интеллект кептелісті азайту үшін қиылыстағы бағдаршамның жұмысын басқарады.
Шерзат Эшматов , жол-техникалық инспекциясы бөлімінің аға инспекторы:
- Өзі көлік легін есептей отырып бағдаршам нысандарының циклын өзгертіп отырады. Жедел жәрдем автокөліктерін өткізуге мүмкіндік береді. Жедел жәрдем көліктеріне трекерлер орнатылған. Қиылысқа жақындағанда сол автокөліктердің кедергісіз өтуіне мүмкіндік береді.
Бұл жүйе электр желісінде ақау шыққан жағдайда да жұмыс істей береді. Себебі әрбір қиылыста қуаты 20 сағатқа дейін жететін қосалқы энергия көздері орнатылған.
Болат Қыдырбайұлы , "Диспетчерлік қызмет орталығы" КММ бөлімі басшысы:
- Қазір қаламызда көлік құралдары көбеюде. Соған байланысты кептеліс те аз емес. Бұл жүйе осыған арналған, енді отандық жүйе болып есептеледі. 2024 жылдан бастап бізді ІТС бағдарламасы енгізілді. Қала бойынша 317 светофорды қамтиды.
«Жаңа жолдар мен ақылды бағдаршамдар, заманауи технологиялар Шымкент көшелеріндегі қозғалысты қауіпсіз етеді», — дейді мамандар.
Алайда кептелісті толықтай жою мүмкін емес. Себебі көлік саны күн санап артып келеді. Қазірдің өзінде шаһарда жарты миллионнан астам автокөлік жүр.
Авторлары: Мансұр Есқожин, Катерина Попкова, Нурмахан Мусатов, Нурмахан Бекмуратов